حکومت نے غیر قانونی امیگریشن روکنے اور جعلی دستاویزات کے ذریعے بیرون ملک جانے والوں کے خلاف اقدامات سخت کرنے کا فیصلہ کیا ہے۔
وزیر داخلہ محسن نقوی اور وزیر اوورسیز پاکستانیز چوہدری سالک حسین کی زیر صدارت ہونے والے اجلاس میں اس سلسلے میں متعدد فیصلے کیے گئے۔
اجلاس میں پروٹیکٹر کے اجرا کے نظام کو فول پروف بنانے اور امیگریشن سسٹم میں اصلاحات کے ذریعے مسافروں کی سہولت کو یقینی بنانے کا فیصلہ کیا گیا۔
وفاقی وزرا نے اجلاس کے بعد سات دن کے اندر حتمی سفارشات پیش کرنے کی ہدایت بھی دی۔ اجلاس میں جعلی ویزوں اور ایجنٹ مافیا میں ملوث عناصر کے خلاف کریک ڈاؤن کا حکم دیا گیا۔
وزیر داخلہ محسن نقوی نے کہا کہ غیر قانونی امیگریشن کو روکنے کے لیے اے آئی بیسڈ ایپ کا پائلٹ پروجیکٹ شروع کیا جا رہا ہے۔
نادرا ریکارڈ کو تبدیل کرکے باہر ملک جانے کی کوشش کرنے والے 5 مسافر آف لوڈ
اس ایپ کے ذریعے معلوم ہو جائے گا کہ کون سفر کے لیے اہل ہے اور کون نہیں۔ انہوں نے کہا کہ جعلی ویزوں اور ایجنٹ مافیا کے خلاف زیرو ٹالرنس اپنایا جائے گا، اور ڈی پورٹ شدہ افراد کے پاسپورٹ منسوخ ہونے کے بعد دوبارہ ویزا حاصل نہ کرنے کو یقینی بنایا جائے گا۔
محسن نقوی نے مزید کہا کہ یکساں انٹرنیشنل ڈرائیونگ لائسنس نیشنل پولیس بیورو سے جاری کیا جائے گا تاکہ دستاویزات کے غلط استعمال کو روکا جا سکے۔
انہوں نے کہا کہ بعض افراد بیرون ملک جانے کے لیے غلط طریقے استعمال کر کے ملک کی ساکھ متاثر کر رہے ہیں، اس لیے امیگریشن ریفارمز کا مقصد عوام کو سہولت فراہم کرنا اور پاکستان کی عالمی ساکھ کو بہتر بنانا ہے۔
وزیر برائے اوورسیز پاکستانیز چوہدری سالک حسین نے کہا کہ لیبر ویزے پر جانے والے افراد کے پاس مستند دستاویزات ہونا ضروری ہیں، اور وزارت ہر ممکن تعاون کرے گی تاکہ پروٹیکٹر اور امیگریشن سسٹم میں اصلاحات کو مؤثر بنایا جا سکے۔
حکام نے واضح کیا کہ یہ اقدامات پاکستان کے شہریوں کو محفوظ اور قانونی طریقے سے بیرون ملک سفر کرنے کی سہولت فراہم کرنے کے لیے کیے جا رہے ہیں، اور غیر قانونی سرگرمیوں کو سختی سے کنٹرول کیا جائے گا۔
