اسلام آباد: وفاقی وزیر خزانہ سینیٹر محمد اورنگزیب نے تصدیق کی ہے کہ آئی ایم ایف کے ساتھ اسٹاف لیول معاہدہ مکمل ہو چکا ہے۔ انہوں نے کہا کہ این ایف سی ایوارڈ کے حوالے سے آئندہ ہفتے اجلاس منعقد ہوگا۔
اسلام آباد میں پریس کانفرنس کرتے ہوئے وزیر خزانہ محمد اورنگزیب نے کہا کہ حکومت ڈھانچہ جاتی اصلاحات پر مسلسل عمل پیرا ہے اور اصلاحات کے عمل میں پیش رفت جاری ہے۔
انہوں نے معاشی شعبوں پر بات کرتے ہوئے کہا کہ کلائمیٹ فنانسنگ، مینوفیکچرنگ اور برآمدات میں بہتری خوش آئند ہے۔ وزیر خزانہ نے بتایا کہ مجموعی طور پر برآمدات میں پانچ فیصد اضافہ ہوا ہے، جبکہ آئی ٹی شعبے میں ماہانہ بنیادوں پر بہتری دیکھی جا رہی ہے اور ترسیلات زر میں بھی اضافہ ہو رہا ہے۔
محمد اورنگزیب نے کہا کہ حکومت نجی شعبے کی حوصلہ افزائی کر رہی ہے اور معاشی بہتری کے تسلسل کو برقرار رکھنا اولین ترجیح ہے۔ انہوں نے مزید کہا کہ پالیسی ریٹ میں کمی کا قرض ادائیگی پر مثبت اثر پڑا ہے اور پانڈا بانڈ کا جلد اجراء متوقع ہے۔
آخر میں وزیر خزانہ نے کہا کہ حکومت سب کچھ ’’پاکستان فرسٹ‘‘ کے ایجنڈے کے تحت کر رہی ہے تاکہ ملک کی معیشت مضبوط اور مستحکم ہو۔
