لاہور میں جاری انٹرنیشنل باکسنگ چیمپئن شپ کے دوران پاکستانی نژاد برطانوی باکسر اور سابق ورلڈ چیمپئن عامر خان نے کہا ہے کہ پاکستان باکسنگ میں روشن مستقبل رکھتا ہے اور جلد یہاں سے محمد علی اور مائیک ٹائسن جیسے عالمی سطح کے چیمپئن سامنے آئیں گے۔
جناح اسپورٹس کمپلیکس لاہور میں منعقدہ چیمپئن شپ میں برطانوی باکسر جیمز میٹکالف نے ڈبلیو بی اے ایشیا گولڈ مڈل ویٹ ٹائٹل جیت لیا۔ انہوں نے ڈومینیکن ریپبلک کے باکسر جولیو ڈی جیسس کو تیسرے راؤنڈ میں ناک آؤٹ کرتے ہوئے کامیابی حاصل کی۔
اسی ایونٹ میں ارجنٹائن کے البرٹو پلمیٹا نے بھی شاندار کارکردگی کا مظاہرہ کیا اور ڈبلیو بی اے ایشیا ساؤتھ ویلٹر ویٹ ٹائٹل جیت لیا۔ انہوں نے فلپائن کے جوفر منٹانو کو چھٹے راؤنڈ میں ناک آؤٹ کرتے ہوئے میدان مار لیا۔
میڈیا سے گفتگو کرتے ہوئے عامر خان نے لاہور میں منعقدہ مقابلوں کو سراہتے ہوئے کہا کہ 15 مختلف ممالک کے باکسرز کی شرکت پاکستان کے لیے فخر کی بات ہے۔ ان کا کہنا تھا کہ یہاں کے شائقین، انتظامات اور سیکیورٹی سب بہترین رہے۔
عامر خان کا کہنا تھا کہ اس چیمپئن شپ کے انعقاد سے پاکستان میں کھیلوں کو فروغ ملے گا اور ملک میں اسپورٹس ٹورزم بھی مزید بہتر ہوگا۔ ان کے مطابق مقامی کھلاڑیوں نے شاندار کارکردگی دکھائی ہے اور وہ یقین رکھتے ہیں کہ مستقبل میں پاکستان عالمی باکسنگ میں نمایاں مقام حاصل کرے گا۔
انہوں نے پاکستان آرمی کا شکریہ ادا کرتے ہوئے کہا کہ غیر ملکی کھلاڑیوں اور مہمانوں کے لیے مثالی سیکیورٹی اور انتظامات فراہم کیے گئے، جس سے ایونٹ کی شاندار میزبانی ممکن ہوئی۔
