پاکستان میں پہلے بین الاقوامی مقابلہ حسن قرأت میں دنیا کے 37 ممالک سے آئے قاری حضرات نے شرکت کی۔ کنونشن سینٹر اسلام آباد میں ہونے والی اس تقریب کا آغاز قاری سید صداقت علی کی قرأت سے ہوا۔
تقریب سے خطاب کرتے ہوئے وفاقی وزیر برائے مذہبی امور سردار یوسف نے کہا کہ دنیا بھر سے آئے قاری حضرات کو پاکستان میں خوش آمدید کہتے ہیں۔ انہوں نے بتایا کہ اس مقابلے میں 37 ممالک کے قاری شریک ہوئے۔
نائب وزیراعظم اسحاق ڈار نے خطاب کرتے ہوئے کہا کہ یہ مقابلہ امت مسلمہ کے اتحاد کے لیے پاکستان کی کوششوں کا مظہر ہے۔ انہوں نے کہا کہ پاکستان واحد ملک ہے جو کلمہ کی بنیاد پر وجود میں آیا، اور نوجوان قرآن کریم کے ساتھ اپنا رشتہ مضبوط بنائیں۔ اسحاق ڈار نے مزید کہا کہ قرآن ہمیں امن، یکجہتی، رحمت اور عدل کا درس دیتا ہے اور ملک کے نظام کو چلانے کے لیے قرآن سے سبق لینا ضروری ہے۔
مقابلہ حسن قرأت میں پہلی پوزیشن حاصل کرنے والے قاری کو 50 لاکھ روپے کا انعام دیا گیا، دوسری پوزیشن والے کو 30 لاکھ روپے اور تیسری پوزیشن والے کو 20 لاکھ روپے کا انعام ملا۔
ملائیشیا کے قاری ایمن رضوان بن محمد رملان نے پہلی پوزیشن حاصل کی، ایران کے قاری عدنان نے دوسری، اور پاکستانی قاری عبد الرشید نے تیسری پوزیشن حاصل کی۔
افغانستان کے قاری نے چوتھی، انڈونیشیا کے قاری نے پانچویں، اور مراکش کے قاری نے چھٹی پوزیشن حاصل کی۔
نائب وزیراعظم اسحاق ڈار اور وفاقی وزیر سردار یوسف نے پوزیشن حاصل کرنے والے قاری حضرات میں انعامات تقسیم کیے۔
