اقوام متحدہ کی سلامتی کونسل نے امریکی صدر ڈونلڈ ٹرمپ کے غزہ منصوبے کی حمایت میں قرارداد منظور کرلی ہے۔ قرار داد کے حق میں 14 ووٹ آئے جبکہ کسی نے مخالفت نہیں کی، تاہم روس اور چین نے ووٹنگ میں حصہ نہیں لیا۔
امریکی مندوب نے سلامتی کونسل میں پاکستان، مصر، قطر، اردن، سعودی عرب، متحدہ عرب امارات، ترکی اور انڈونیشیا کا شکریہ ادا کرتے ہوئے کہا کہ تمام ممالک نے صورتحال کی سنگینی کا ادراک کرتے ہوئے غزہ کے استحکام کے لیے اقدامات کیے۔ انہوں نے کہا کہ آج ایک تاریخی اور تعمیری قرارداد منظور ہوئی ہے۔
منظور شدہ قرار داد میں غزہ کے لیے بین الاقوامی استحکام فورس کی تعیناتی اور غزہ میں عبوری حکومت کے قیام کے نکات شامل ہیں۔
پاکستان نے امریکی صدر ٹرمپ کے غزہ منصوبے کی اقوام متحدہ میں بھرپور حمایت کی، عاصم افتخار
دوسری جانب فلسطینی مزاحمتی گروپ حماس نے اس قرارداد کو مسترد کردیا ہے۔ حماس کا کہنا ہے کہ سلامتی کونسل کی قرارداد فلسطینیوں کے حقوق اور مطالبات کو پورا نہیں کرتی اور یہ غزہ پر بین الاقوامی سرپرستی مسلط کرے گی۔ حماس کے مطابق انسانی امداد کا انتظام اقوام متحدہ کے زیر نگرانی فلسطینی اداروں کے پاس ہونا چاہیے، نہ کہ بین الاقوامی فورس کے کنٹرول میں۔
