معروف پاکستانی مصنف اور ڈائریکٹر خلیل الرحمان قمر نے سپر اسٹار ہمایوں سعید کی اداکاری کو سراہتے ہوئے کہا کہ ان کی کارکردگی بالی ووڈ کے مشہور خانز سے بھی بہتر ہے۔
ایک پوڈکاسٹ میں گفتگو کرتے ہوئے خلیل الرحمان قمر نے کہا کہ ڈرامہ ’میرے پاس تم ہو‘ میں ہمایوں سعید نے جو پرفارمنس دی، وہ بے حد شاندار تھی اور بالی ووڈ کے خانز کبھی بھی ایسی اداکاری نہیں کر سکتے۔
انہوں نے مزید کہا کہ ہمایوں سعید نہ صرف ایک کامیاب اداکار ہیں بلکہ ایک بڑے فلم پروڈیوسر بھی ہیں جو شائقین کو سنیما گھروں تک کھینچنے کی صلاحیت رکھتے ہیں۔ حال ہی میں ان کی فلم ’لوو گرو‘ اور ڈرامہ ’میں منٹو نہیں ہوں‘ دونوں بے حد کامیاب رہے ہیں۔
گفتگو کے دوران خلیل الرحمان قمر نے اداکار عدنان صدیقی کی بھی تعریف کی اور کہا کہ انہیں ایک ایسا کردار چاہیے تھا جو ارب پتی لگے، اور یہ کردار عدنان صدیقی نے بہترین طریقے سے نبھایا، جس سے ناظرین کو یقین ہو گیا کہ وہ واقعی ایک امیر اور طاقتور شخص ہیں۔
