پاکستانی شوبز انڈسٹری کی معروف اداکارہ مہوش حیات نے کہا ہے کہ ان کا کیرئیر اتنے سالوں پر محیط نہیں جتنا لوگ سمجھتے ہیں۔ اداکارہ نے ایک انٹرویو میں بتایا کہ انہوں نے صرف 8 سال کی عمر میں اشتہارات کے ذریعے شوبز میں قدم رکھا اور بعد ازاں ڈراموں اور فلموں کی صفِ اول کی اداکاراؤں میں شامل ہوگئیں۔
مہوش حیات نے کہا، "میں گزشتہ 7 سال سے ٹی وی اسکرین سے دور تھی، تاہم حال ہی میں ڈرامہ ڈائن کے ذریعے شاندار واپسی کی ہے۔” انہوں نے مزید وضاحت کی کہ "لوگ سمجھتے ہیں کہ میں 20 سال سے کام کر رہی ہوں، لیکن حقیقت میں میرا کیرئیر صرف 14 سے 15 سال پر محیط ہے۔”
اداکارہ نے کہا کہ ان کی ابتدائی پرفارمنسز ناظرین کے ذہنوں میں گہرے نقوش چھوڑ گئیں، جس کی وجہ سے سب کو یہ گمان ہوتا ہے کہ وہ بہت عرصے سے کام کر رہی ہیں۔ مہوش نے واضح کیا کہ وہ اب بھی نئے کرداروں اور مضبوط اسکرپٹس کے انتخاب میں محتاط ہیں اور چاہتی ہیں کہ ان کے کام سے ان کی شناخت مزید نکھرے۔ انہوں نے کہا، "مجھے اپنے کام کے حوالے سے زندگی میں کسی قسم کا پچھتاوا نہیں ہے۔”
