کراچی: پاکستان کی معروف سابق ماڈل اور اداکارہ ونیزہ احمد نے انکشاف کیا ہے کہ وہ چند سال قبل ابتدائی درجے کے کینسر (لمفوما) میں مبتلا ہوئیں، تاہم قرآن پاک کی تلاوت، دعا اور روحانی عبادتوں کے ذریعے مکمل صحت یاب ہوگئیں۔
ونیزہ احمد نے یہ بات ندا یاسر کے مارننگ شو میں گفتگو کے دوران بتائی۔ اُن کا کہنا تھا کہ اپنے فیشن کیریئر کے عروج پر، جب وہ اکثر بیرون ملک شوز کے لیے سفر کرتی تھیں، تو انہیں شدید سر درد رہنے لگا۔ ابتدائی طور پر ڈاکٹرز نے انہیں میننجائٹس (گردن توڑ بخار) بتایا، مگر بعد ازاں ٹیسٹ سے معلوم ہوا کہ انہیں لمفوما کینسر ہے۔
اداکارہ نے بتایا، “مجھے یقین نہیں آیا کہ میں کینسر کا شکار ہوں۔ ڈاکٹرز نے کہا کہ یہ زیرو اسٹیج پر ہے، لیکن میں بہت خوفزدہ تھی۔ پھر میں ایک روحانی خاتون کے پاس گئی جنہوں نے مجھے قرآن پاک کی سورتیں پڑھنے اور دعا میں لگے رہنے کا مشورہ دیا۔”
ونیزہ احمد نے مزید بتایا، “میں نے کیموتھراپی یا آپریشن نہیں کروایا، صرف دعا، ذکر اور تلاوت سے علاج کیا۔ کچھ ہفتوں بعد میری رپورٹس بالکل صاف آگئیں، اور آج میں بالکل صحت مند زندگی گزار رہی ہوں۔”
انہوں نے کہا کہ “انسان جتنی بھی بڑی بیماری میں مبتلا ہو، ایمان، صبر اور دعا سب سے بڑی دوا ہیں۔ اللہ پر یقین رکھنے والا کبھی مایوس نہیں ہوتا۔”
