راولپنڈی کرکٹ اسٹیڈیم میں پاکستان اور جنوبی افریقا کے درمیان دو ٹیسٹ میچوں کی سیریز کے دوسرے اور آخری میچ کا آغاز ہو گیا ہے۔ پاکستان نے ٹاس جیت کر پہلے بیٹنگ کا فیصلہ کیا اور میچ کے آغاز پر بغیر کسی وکٹ کے نقصان کے 32 رنز بنائے ہیں۔
پاکستان کی جانب سے اننگز کا آغاز امام الحق اور عبداللہ شفیق نے کیا، جنہوں نے پُراعتماد انداز میں کھیلتے ہوئے ابتدائی اوورز میں کوئی وکٹ نہیں گرنے دی۔
قومی ٹیم کے کپتان شان مسعود نے بتایا کہ آج کے میچ کے لیے ٹیم میں ایک تبدیلی کی گئی ہے۔ فاسٹ بولر حسن علی کو آرام دیا گیا ہے اور ان کی جگہ آصف آفریدی کو ٹیم میں شامل کیا گیا ہے، جو اپنا ٹیسٹ ڈیبیو کر رہے ہیں۔
آصف آفریدی کو قومی ٹیسٹ کیپ شاہین شاہ آفریدی نے پیش کی۔ انہوں نے 39 سال اور 299 دن کی عمر میں اپنے بین الاقوامی ٹیسٹ کیریئر کا آغاز کیا، جو ایک خاص موقع سمجھا جا رہا ہے۔
لاہور ٹیسٹ: پاکستان نے جنوبی افریقا کو 93 رنز سے شکست دے کر سیریز میں 0-1 کی برتری حاصل کرلی
جنوبی افریقا کے کپتان ایڈن مارکرم نے کہا کہ اگر وہ ٹاس جیتتے تو بیٹنگ کا ہی انتخاب کرتے۔ ان کی ٹیم میں دو تبدیلیاں کی گئی ہیں، کیشو مہاراج اور مارکو جینسن کو شامل کیا گیا ہے۔
واضح رہے کہ پاکستان کو دو میچز پر مشتمل اس ٹیسٹ سیریز میں ایک صفر کی برتری حاصل ہے۔ گرین کیپس نے لاہور میں کھیلے گئے پہلے ٹیسٹ میں جنوبی افریقا کو 93 رنز سے شکست دی تھی۔
