ہانگ کانگ: ہانگ کانگ انٹرنیشنل ایئرپورٹ پر پیش آنے والے ایک افسوسناک واقعے میں کارگو طیارہ رن وے سے پھسل کر سمندر میں جا گرا، جس کے نتیجے میں دو گراؤنڈ اسٹاف اہلکار جان کی بازی ہار گئے۔
مقامی میڈیا رپورٹس کے مطابق، امارات کی پرواز EK9788، جو کہ بوئنگ 747-481 طیارہ تھا اور ترک کارگو ایئرلائن "ایئر ACT” کی ملکیت تھی، دبئی سے ہانگ کانگ آ رہی تھی۔
طیارہ مقامی وقت کے مطابق صبح 3:50 بجے شمالی رن وے پر لینڈنگ کے دوران ایک گراؤنڈ گاڑی سے ٹکرا گیا، جس کے بعد وہ پھسل کر سمندر میں جا گرا۔
حادثے میں دو گراؤنڈ اسٹاف اہلکار سمندر میں جا گرے۔ انہیں فوری طور پر ریسکیو کر کے اسپتال منتقل کیا گیا، مگر وہ زخموں کی تاب نہ لاتے ہوئے دم توڑ گئے۔
ریسکیو آپریشن میں گورنمنٹ فلائنگ سروس کے ہیلی کاپٹرز اور فائر سروسز کے بحری جہاز بھی شامل تھے۔
طیارے میں موجود چاروں عملے کے ارکان محفوظ رہے، جنہیں معمولی چوٹوں کے بعد اسپتال منتقل کر دیا گیا ہے۔
حادثے کے باعث متاثرہ رن وے کو بند کر دیا گیا ہے، تاہم ہانگ کانگ ایئرپورٹ کی باقی دو رن ویز بدستور فعال ہیں۔
ایئرپورٹ اتھارٹی کے مطابق، کم از کم 11 کارگو پروازیں منسوخ کر دی گئی ہیں، اور صبح 10 بجے پریس کانفرنس متوقع ہے۔
یہ حادثہ ہانگ کانگ ایئرپورٹ پر ایک نایاب واقعہ ہے، کیونکہ یہ ہوائی اڈہ عام طور پر بہترین حفاظتی ریکارڈ کے لیے پہچانا جاتا ہے۔
