تحریک انصاف کے سیکرٹری جنرل سلمان اکرم راجہ نے کہا ہے کہ گزشتہ روز پارٹی پر جو الزامات عائد کیے گئے ہیں وہ سراسر بے بنیاد ہیں۔ اپنے بیان میں انہوں نے کہا کہ پارٹی جامع حکمتِ عملی کی حامی ہے جس کا مقصد آپریشنوں میں معصوم افراد کے جانی نقصان کو روکا جانا ہے اور دہشت گرد عناصر کو وطن سے ختم کرنا ہے۔
سلمان اکرم راجہ نے واضح طور پر کہا کہ جو بھی الزامات لگائے گئے ان کی کوئی حقیقت نہیں اور پی ٹی آئی ہمیشہ ملک کی سلامتی اور عوام کے مفاد میں موقف رکھتی آئی ہے۔ ان کے بقول مسئلے کا حل طاقت کے ساتھ ساتھ سمجھداری اور مکالمے سے بھی ممکن ہے۔
ادھر خیبرپختونخوا کے صدر جنید اکبر نے پشاور میں پریس کانفرنس میں کہا کہ اس وقت صوبائی اسمبلی میں پی ٹی آئی کے پاس مینڈیٹ موجود ہے، تاہم وفاقی حکومت اور متعلقہ ادارے وزیراعلیٰ کے انتخاب میں رکاوٹیں کھڑی کر رہے ہیں۔ انہوں نے سہیل آفریدی کو تعلیم یافتہ اور ایماندار قرار دیتے ہوئے کہا کہ پارٹی انہیں بھرپور حمایت دے گی اور ان کے 92 اراکین انہیں ووٹ دیں گے۔
جنید اکبر نے مزید کہا کہ عوام کی رائے بات چیت کے حق میں ہے اور پی ٹی آئی کھل کر طالبان سے مذاکرات کی حمایت کرتی ہے تاکہ اس مسئلے کا پائیدار حل تلاش کیا جا سکے۔ انہوں نے عوام اور دیگر پارٹی رہنماؤں سے امن و مصالحت کی طرف قدم بڑھانے کی اپیل بھی کی۔
