امیر بالاج قتل کیس کے مرکزی ملزم طیفی بٹ کو دبئی میں ایک دعوت کے دوران گرفتار کر لیا گیا ہے۔ پولیس ذرائع کے مطابق، دبئی پولیس کے ایکسٹراڈیشن سیل کے ڈی ایس پی خالد وریا پہلے سے ہی اس تقریب میں موجود تھے جہاں طیفی بٹ بھی موجود تھا۔
ڈی ایس پی خالد وریا دو اشتہاری ملزمان کی گرفتاری کے لیے دبئی گئے تھے اور وہاں دبئی پولیس کے تعاون سے کارروائی کرتے ہوئے طیفی بٹ کو گرفتار کیا گیا۔
ذرائع کا کہنا ہے کہ طیفی بٹ ویزا کی میعاد ختم ہونے پر دبئی آیا تھا تاکہ ویزے کی تجدید کروا سکے، جس دوران اس کی گرفتاری عمل میں آئی۔
امیر بالاج ٹیپو قتل کیس،مرکزی ملزم طیفی بٹ دبئی سے گرفتار
اب طیفی بٹ کی ریڈ وارنٹ کے تحت گرفتاری اور پاکستان روانگی کا عمل شروع کر دیا گیا ہے۔
یاد رہے کہ فروری 2024 میں ٹیپو ٹرکاں والا کے بیٹے امیر بالاج کو شادی کی تقریب میں فائرنگ کر کے قتل کیا گیا تھا۔ اس مقدمے میں طیفی بٹ سمیت دیگر ملزمان نامزد تھے، جبکہ مرکزی ملزم احسن شاہ پولیس مقابلے میں مارا جا چکا ہے۔ طیفی بٹ فرار تھا جو اب دبئی سے گرفتار کر لیا گیا ہے۔
