حال ہی میں سوشل میڈیا پر یہ دعویٰ تیزی سے پھیلایا گیا کہ پاکستانی کرنسی نوٹوں سے "حصولِ رزقِ حلال عبادت ہے” کے الفاظ ہٹا دیے گئے ہیں۔
اس خبر نے عوام میں بے چینی پیدا کر دی، اور بہت سے افراد نے اس اقدام کو اسلامی اقدار سے دوری سے تعبیر کیا۔
تاہم، اسٹیٹ بینک آف پاکستان نے اس تاثر کی تردید کرتے ہوئے واضح کیا ہے کہ تمام جاری کردہ کرنسی نوٹوں پر یہ عبارت اب بھی موجود ہے۔ اسٹیٹ بینک کے مطابق، 10 روپے سے لے کر 5000 روپے کے تمام نوٹوں کی پشت پر یہ جملہ واضح طور پر درج ہے۔
بینک کی ویب سائٹ پر شائع کردہ نوٹوں کے ڈیزائن اور تفصیلات میں بھی اس بات کی تصدیق کی گئی ہے۔ ایک اعلیٰ حکومتی ذریعے نے بتایا کہ یہ الفاظ کسی نوٹ سے نہ تو ماضی میں ہٹائے گئے اور نہ ہی مستقبل میں ایسا کوئی ارادہ ہے۔
اس کے علاوہ آزاد ذرائع نے بھی مختلف کرنسی نوٹوں کا جائزہ لیا جس میں یہ بات ثابت ہوئی کہ "حصولِ رزقِ حلال عبادت ہے” کی عبارت نوٹوں پر بدستور موجود ہے۔
اسٹیٹ بینک نے نئے کرنسی نوٹوں کے ڈیزائن کی منظوری دے دی، چھپائی کابینہ کی منظوری سے مشروط
اس طرح، یہ واضح ہو گیا ہے کہ سوشل میڈیا پر گردش کرنے والی یہ بات محض افواہ تھی جس کا حقیقت سے کوئی تعلق نہیں۔ عوام سے گزارش ہے کہ ایسی حساس خبروں پر یقین کرنے سے پہلے تصدیق ضرور کریں۔
