56
پنجاب حکومت نے سکولوں کی گرمیوں کی چھٹیوں میں ایک بار پھر تبدیلی کر دی، نویں، دسویں اور انٹرمیڈیٹ کلاسز 18 اگست سے جبکہ پہلی سے آٹھویں جماعت یکم ستمبر سے شروع ہوں گی۔
لاہور، پنجاب حکومت نے صوبے میں اسکولوں کی گرمیوں کی تعطیلات کے شیڈول میں ایک بار پھر ردوبدل کر دیا ہے۔ محکمہ تعلیم کے مطابق پہلی سے آٹھویں جماعت تک کلاسز اب یکم ستمبر سے شروع ہوں گی، جبکہ نویں، دسویں، او لیول، اے لیول اور انٹرمیڈیٹ کلاسز 18 اگست سے بحال ہوں گی۔
وزیرِ تعلیم پنجاب رانا سکندر حیات نے بتایا کہ اس فیصلے کا اطلاق صوبے کے تمام نجی اور سرکاری تعلیمی اداروں پر ہوگا۔ ان کے مطابق چھٹیوں میں کمی یا اضافے کا فیصلہ تعلیمی ماہرین سے مشاورت کے بعد کیا گیا تاکہ طلبہ کی پڑھائی کا تسلسل برقرار رکھا جا سکے۔
واضح رہے کہ اس سے قبل صوبائی حکومت نے شدید گرمی کے باعث تعطیلات میں توسیع کا اعلان کیا تھا، تاہم موسم کی صورتحال میں بہتری کے بعد نیا شیڈول جاری کیا گیا ہے۔
