سینئر اور معروف اداکارہ عتیقہ اوڈھو آج کل اپنے ایک ویڈیو بیان کے باعث سوشل میڈیا پر خبروں کا مرکز بنی ہوئی ہیں، جس میں انہوں نے ہنستے ہوئے کہا تھا کہ ان کی شادی خطرے میں ہے کیونکہ وہ حد سے زیادہ ڈرامے دیکھ رہی ہیں۔
ان کے اس طنزیہ جملے نے نہ صرف سوشل میڈیا پر خوب پذیرائی حاصل کی بلکہ مداحوں کی جانب سے دلچسپ ردعمل بھی سامنے آیا، یہاں تک کہ ان کے ان باکس میں شادی کی پیشکشوں کا تانتا بندھ گیا۔
عتیقہ اوڈھو نے ایک ڈرامہ ریویو شو میں شرکت کے دوران وضاحت کرتے ہوئے کہا کہ "میں نے پچھلے ہفتے مذاق میں کہا تھا کہ میری شادی خطرے میں ہے کیونکہ میں بہت زیادہ ڈرامے دیکھ رہی ہوں، تو اس پر لوگوں نے اتنی ہمدردی دکھائی کہ میرے ڈی ایم میں شادی کی آفرز آنے لگیں، اور اب میرا ان باکس ان سے بھرا ہوا ہے، انہوں نے قہقہہ لگاتے ہوئے بتایا کہ "میں اس ساری صورتحال سے خوب لطف اندوز ہو رہی ہوں۔
انہوں نے مزید کہا کہ "آج میں یہ روایتی سرخ لباس اس لیے پہن کر آئی ہوں کہ کبھی کبھار شوہروں کو تھوڑی سی ٹینشن دینا ضروری ہوتا ہے۔ خواتین کو سیکھنا چاہیے کہ شوہروں کو دباؤ میں کیسے رکھا جاتا ہے۔” ان کے اس شوخ اور بےباک انداز نے ناظرین کو خوب محظوظ کیا۔
عتیقہ اوڈھو نے گفتگو کے دوران سوشل میڈیا کے بڑھتے ہوئے اثرات پر بھی روشنی ڈالی اور کہا کہ اب میں نے سمجھ لیا ہے کہ سوشل میڈیا کو کس طرح مؤثر انداز میں استعمال کیا جا سکتا ہے، یہ ایک طاقتور ذریعہ بن چکا ہے۔
