اسلام آباد ، آپریشن سندور میں بھارت کو تاریخی ناکامی کا سامنا کرنا پڑا، جب کہ پاکستان کی دفاعی صلاحیت اور چینی ٹیکنالوجی نے بھارتی فضائیہ کے جدید ترین رافیل طیارے کو تباہ کر کے مودی سرکار کے اربوں کے دفاعی بجٹ کو مذاق بنا دیا۔
بین الاقوامی خبر رساں ادارے نے اپنی ایک تفصیلی رپورٹ میں اس فضائی معرکے کے پسِ پردہ اہم حقائق اور تجزیے پیش کیے ہیں، جنہوں نے بھارت کے تمام تر دفاعی دعوؤں کا بھانڈا پھوڑ دیا۔
رپورٹ کے مطابق پاک فضائیہ نے ائیر چیف ظہیر احمد بابر سدھو کی قیادت میں چینی ساختہ PL-15 میزائل سے 200 کلومیٹر دور سے بھارتی رافیل طیارے کو نشانہ بنایا، جو کہ اپنی نوعیت کا پہلا واقعہ ہے، رافیل طیارہ جو اب تک کسی جنگ میں تباہ نہیں ہوا تھا، اس کی تباہی ایک تاریخی لمحہ ثابت ہوئی، اس کامیابی کی بنیاد بھارتی انٹیلیجنس کی سنگین غلطی تھی، جس نے پاکستانی میزائل کی رینج کو کم سمجھا، جس کا نتیجہ بھارتی پائلٹس کی سنگین غلط فہمی کی صورت میں سامنے آیا۔
رائٹرز کے مطابق پاکستان نے الیکٹرانک وارفیئر کے ذریعے بھارتی ریڈار، نیویگیشن اور کمیونیکیشن سسٹم کو جیم کر دیا، جبکہ سویڈن کے ریڈار، چینی میزائل سسٹم اور پاکستانی ڈیٹا لنک کی ہم آہنگی نے پاک فضائیہ کو فیصلہ کن برتری دلائی۔
رپورٹ میں مزید انکشاف کیا گیا ہے کہ بھارتی فضائی بیڑہ مختلف ملکوں کے طیاروں پر مشتمل ہونے کے باعث مربوط دفاعی حکمت عملی وضع کرنے میں ناکام رہا، اس کے برعکس پاکستان کا سسٹم مربوط اور ہم آہنگ تھا، جس نے فیصلہ کن کردار ادا کیا۔
ابتدائی ناکامیوں کے بعد بھارت نے اپنی حکمت عملی بدلتے ہوئے براہموس میزائلوں کے ذریعے پاکستانی تنصیبات کو نشانہ بنانے کی کوشش کی، تاہم چین نے فوری ردعمل دیتے ہوئے اپنے ائیر چیف کو پاکستان روانہ کیا تاکہ چینی ٹیکنالوجی کی کامیابی کا جائزہ لیا جا سکے۔
اس شدید کشیدگی کے بعد بالآخر امریکہ کی سفارتی مداخلت سے جنگ بندی ممکن ہوئی، مگر فرانس کے ایئر چیف کی تصدیق کے باوجود مودی حکومت رافیل کی تباہی کو تسلیم کرنے سے انکاری رہی۔
یاد رہے کہ رافیل کا پہلی بار کسی جنگ میں تباہ ہونا مودی حکومت کے لیے بین الاقوامی سطح پر شدید سبکی کا باعث بنا۔ ناقدین کے مطابق مودی کی ناقص دفاعی حکمت عملی نے نہ صرف بھارتی افواج کو نقصان پہنچایا بلکہ عالمی سطح پر بھارت کے دفاعی ساکھ کو بھی شدید متاثر کیا۔
