اسلام آباد میں خطاب کرتے ہوئے جے یو آئی (ف) کے رہنما مولانا عبدالغفور حیدری نے امریکا پر تنقید کرتے ہوئے کہا کہ ٹرمپ کا کردار متضاد رہا ہے، امریکا پر بھروسہ نہیں کیا جا سکتا۔
اسلام آباد: جمعیت علمائے اسلام (ف) کے سینئر رہنما مولانا عبدالغفور حیدری نے وفاقی دارالحکومت میں ایک تقریب سے خطاب کرتے ہوئے امریکا کی پالیسیوں کو شدید تنقید کا نشانہ بنایا۔ ان کا کہنا تھا کہ امریکا، خاص طور پر ڈونلڈ ٹرمپ، عالمی سطح پر چودھراہٹ کا کردار ادا کرنے کی کوشش کر رہا ہے، مگر اس پر کسی صورت بھروسہ نہیں کیا جا سکتا۔
مولانا حیدری نے پاک بھارت جنگ کا حوالہ دیتے ہوئے کہا کہ جب دونوں ممالک کے درمیان کشیدگی بڑھی تو ابتدا میں ٹرمپ نے لاتعلقی ظاہر کی، لیکن جب بھارت کو شدید ردعمل کا سامنا کرنا پڑا تو امریکا نے فوری طور پر جنگ بندی کروا دی۔ ان کے مطابق، یہ امریکا کے دوہرے معیار کی ایک اور واضح مثال ہے۔
جے یو آئی (ف) کے رہنما نے اپنے خطاب میں سعودی عرب اور پاکستان کے تعلقات کو گہرا اور تاریخی قرار دیا۔ ان کا کہنا تھا کہ سعودی عرب نے ہمیشہ پاکستان کے ساتھ خیرسگالی کا مظاہرہ کیا ہے، خاص طور پر حج کے موقع پر بہترین انتظامات کر کے امت مسلمہ کی حقیقی خدمت انجام دی ہے۔
یاد رہے کہ مولانا عبدالغفور حیدری ماضی میں بھی عالمی طاقتوں، خاص طور پر امریکا، کی مسلم دنیا سے متعلق پالیسیوں پر سوال اٹھاتے رہے ہیں، اور انہوں نے متعدد مواقع پر امت مسلمہ کے اتحاد پر زور دیا ہے۔
