اسلام آباد، جے یو آئی ف کے سربراہ مولانا فضل الرحمان کا کہنا ہے کہ 27اپریل کولاہورمیں غزہ کے حق میں بہت بڑا ملین مارچ ہوگا۔
اسلام آباد میں پریس کانفرنس کے دوران سربراہ جے یو آئی (ف) مولانا فضل الرحمان نے کہا کہ ہم نے کراچی میں بہت بڑا ملین مارچ کیا، اس حوالے سے جے یو آئی کی مرکزی مجلس عمومی کا اجلاس 19 اور 20 اپریل کو لاہور میں منعقد ہوا۔
مولانا فضل الرحمان کا کہنا ہے کہ اجلاس میں فیصلہ ہوا کہ 27اپریل کو لاہور میں بہت بڑا ملین مارچ ہوگا، انسانی حقوق کی تنظیمیں غزہ میں جنگی جرائم کی پشت پناہی کررہی ہے، جے یو آئی فلسطین کی جدوجہد آزادی کی حمایت جاری رکھے گی۔
سربراہ جے یو آئی ف نے کہا کہ لاہورکا ملین مارچ امت مسلمہ کی آواز ہوگی، گیارہ مئی کو پشاورمیں غزہ کے شہدا کو خراج عقیدت پیش کرنے کے لیے ملین مارچ ہو گا، کوئٹہ میں بھی ملین مارچ ہوگا۔
مولانا فضل الرحمان کا کہنا ہے کہ اسرائیل ایک ناجائز ملک ہے، اس کی حیثیت قابض کی ہے، فلسطین یا عرب کی زمین پر وہ قابض ہے، نیتن یاہو کا کہنا کہ ان کی پوزیشن دفاعی ہے، اگر دفاع ہے تو عام شہریوں پر بمباری کیوں ہوتی ہے؟ پاکستانی قوم اور تاجروں سے اپیل ہے وہ مالی جہاد میں شریک ہوں، معصوم فلسطینیوں کو سفاک ملک کے حوالے نہیں کرسکتے۔
سربراہ جے یو آئی (ف) نے کہا کہ کے پی، بلوچستان، سندھ میں بدامنی کی صورتحال ناقابل بیان ہے، مسلح دہشتگرد دندناتے پھر رہے ہیں حکومت کی رٹ نہیں ہے، والدین بچوں کو سکول نہیں بھیج سکتے، کاروباری طبقہ پریشان ہے، تاجروں سے منہ مانگے بھتے مانگے جارہے ہیں، حکومت اور سکیورٹی ادارے عوام کے جان و مال کے تحفظ میں ناکام نظر آرہے ہیں۔
مولانا فضل الرحمان نے کہا کہ دھاندلی کے نتیجے میں بننے والی حکومت ناکام ہوچکی ہے، ہماری جماعت نے 2018 اور 2024 کے انتخابات کو دھاندلی زدہ قرار دیا اور نتائج مسترد کئے ، ان اسمبلیوں کو عوامی نمائندہ نہیں کہہ سکتے۔
