قومی ٹیم نے پہلے ہی میچ میں شاندار کھیل پیش کرتے ہوئے کرغیزستان کو سیدھے سیٹس میں شکست دے دی، جبکہ اگلے دو گروپ میچز قازقستان اور تھائی لینڈ کے خلاف کھیلے جائیں گے۔
چین کے شہر ہائیکو میں جاری ایشین بوائز انڈر 18 والی بال چیمپئن شپ 2026 میں پاکستان نے اپنے پہلے ہی میچ میں شاندار کارکردگی کا مظاہرہ کرتے ہوئے کرغیزستان کو 3-0 سے شکست دے کر ایونٹ کا کامیاب آغاز کیا۔
قومی ٹیم نے میچ کے آغاز سے ہی کھیل پر مکمل کنٹرول برقرار رکھا اور مؤثر سروس، مضبوط دفاع، عمدہ بلاکنگ اور جارحانہ حملوں کی بدولت حریف ٹیم کو زیادہ مواقع نہ دیے۔
پاکستان کی سیدھے سیٹس میں کامیابی
پاکستان نے پہلا سیٹ یکطرفہ مقابلے کے بعد 25-10 سے اپنے نام کیا۔ اس سیٹ میں قومی کھلاڑیوں نے شاندار ہم آہنگی کا مظاہرہ کرتے ہوئے کرغیزستان کو ابتدا ہی سے دباؤ میں رکھا۔
دوسرے سیٹ میں کرغیزستان نے بہتر کھیل پیش کرنے کی کوشش کی، تاہم پاکستان نے نظم و ضبط برقرار رکھتے ہوئے 25-19 سے کامیابی حاصل کی اور میچ میں اپنی برتری مزید مستحکم کر لی۔
تیسرے سیٹ میں بھی گرین شرٹس نے دفاع اور حملے دونوں شعبوں میں عمدہ کھیل کا مظاہرہ کیا اور 25-17 سے کامیابی سمیٹ کر میچ بغیر کوئی سیٹ ہارے 3-0 سے جیت لیا۔
فیفا ورلڈ کپ: میکسیکو نے جنوبی کوریا کو اکھاڑ پچھاڑا، ناک آؤٹ مرحلے میں پہنچنے والی پہلی ٹیم بن گئی
قومی کھلاڑیوں کی نمایاں کارکردگی
پاکستان کی فتح میں کئی کھلاڑیوں نے اہم کردار ادا کیا۔ فہد علی نے جارحانہ اٹیکنگ کے ذریعے ٹیم کو قیمتی پوائنٹس دلائے، جبکہ محمد انس کی مؤثر بلاکنگ نے حریف کے حملوں کو ناکام بنایا۔
کپتان محمد عرفان نے میدان میں بہترین قائدانہ صلاحیتوں کا مظاہرہ کیا، جبکہ اسد اللہ نے دفاعی کھیل میں نمایاں کردار ادا کیا۔ فیضان اللہ کی مؤثر اسماشز اور حملوں نے بھی پاکستان کی کامیابی میں اہم حصہ ڈالا۔
ہیڈ کوچ کا ردِعمل
پاکستان انڈر 18 ٹیم کے ہیڈ کوچ کفایت اللہ نے کامیابی پر اطمینان کا اظہار کرتے ہوئے کہا کہ کسی بھی بڑے ٹورنامنٹ کا فاتحانہ آغاز ٹیم کے اعتماد کے لیے انتہائی اہم ہوتا ہے۔
انہوں نے کہا کہ کھلاڑیوں نے کوچنگ اسٹاف کی حکمتِ عملی پر مؤثر انداز میں عمل کیا، نظم و ضبط برقرار رکھا اور پورے میچ کے دوران اعتماد کے ساتھ کھیل پیش کیا۔ تاہم ان کے مطابق ٹیم کی تمام تر توجہ اب آئندہ گروپ میچز پر مرکوز ہے کیونکہ اگلے دونوں حریف مضبوط اور تجربہ کار ہیں۔
اگلے میچز کب ہوں گے؟
گروپ مرحلے میں پاکستان اپنا دوسرا میچ 13 جولائی کو قازقستان کے خلاف کھیلے گا، جبکہ تیسرا اور آخری گروپ میچ 14 جولائی کو تھائی لینڈ کے خلاف ہوگا۔
دونوں میچز پاکستانی وقت کے مطابق صبح 7:30 بجے شروع ہوں گے۔ قومی ٹیم کی کوشش ہوگی کہ گروپ مرحلے میں اپنی شاندار فارم برقرار رکھتے ہوئے اگلے مرحلے کے لیے مضبوط پوزیشن حاصل کرے۔
