بھارتی آبی جارحیت سے نمٹنے اور پانی کے ذخائر میں اضافے کے لیے حکومت نے دریائے چناب پر چنیوٹ کے مقام پر نیا ڈیم تعمیر کرنے کا فیصلہ کر لیا ہے۔
سینیٹر شہادت اعوان کی زیرِ صدارت سینیٹ کی قائمہ کمیٹی برائے آبی وسائل کے اجلاس میں بتایا گیا کہ مجوزہ ڈیم کی فزیبلٹی رپورٹ مکمل کر لی گئی ہے جبکہ پی سی ون کی تیاری کا عمل جاری ہے۔ کمیٹی کو آگاہ کیا گیا کہ 824 ارب روپے مالیت کا قومی فلڈ پروٹیکشن پلان مشترکہ مفادات کونسل کی منظوری کا منتظر ہے۔
اجلاس میں سینیٹ کمیٹی نے تمام صوبوں کو دریاؤں کے کناروں اور راستوں سے تجاوزات فوری طور پر ہٹانے کی ہدایت جاری کر دی۔ چیئرمین کمیٹی نے پنجاب اور سندھ میں تجاوزات کے مکمل خاتمے میں سستی پر شدید برہمی کا اظہار کرتے ہوئے کہا کہ اگر آئندہ مون سون سے پہلے تجاوزات نہ ہٹائی گئیں تو اسے مجرمانہ غفلت تصور کیا جائے گا۔
واپڈا حکام نے کمیٹی کو ملک بھر میں پانی کے بہاؤ کی نگرانی اور ممکنہ سیلاب سے قبل وارننگ دینے کے لیے نصب کیے جانے والے ٹیلی میٹری سسٹم کی پیش رفت پر بھی بریفنگ دی۔
