وفاقی وزیر داخلہ محسن نقوی نے نیشنل پولیس اکیڈمی کا دورہ کیا، زیر تعمیر 11 منزلہ ہاسٹل کا معائنہ کیا، افسران سے ملاقات کی اور تربیتی سہولیات میں بہتری پر اطمینان کا اظہار کیا۔
وفاقی وزیر داخلہ محسن نقوی نے نیشنل پولیس اکیڈمی کا تفصیلی دورہ کیا جہاں انہوں نے زیر تعمیر 11 منزلہ ہاسٹل سمیت دیگر تربیتی سہولیات کا معائنہ کیا۔ ہاسٹل میں 126 کمروں کی تعمیر جاری ہے جسے پانچ ماہ میں مکمل کرنے کا ہدف مقرر کیا گیا ہے۔ وزیر داخلہ نے ہدایت کی کہ تعمیراتی کام کی رفتار کے ساتھ ساتھ معیار پر کوئی سمجھوتہ نہ کیا جائے۔
محسن نقوی نے اکیڈمی کے سوئمنگ پول کا دورہ کیا اور زیر تربیت پولیس افسران کے درمیان سوئمنگ مقابلہ بھی دیکھا۔ انہوں نے افسران اور انسٹرکٹرز کی حوصلہ افزائی کرتے ہوئے ان کی تربیت کو مزید مؤثر بنانے پر زور دیا۔
اس دوران وزیر داخلہ نے کلاس رومز، آفیسرز میس اور کھانے کے معیار کا جائزہ لیا اور زیر تربیت افسران سے براہ راست ملاقات کر کے ان کی تجاویز سنیں۔ افسران نے سہولیات میں بہتری پر وزیر داخلہ کا شکریہ ادا کیا۔
عمران خان کو میرے استعفوں سے متعلق مکمل حقائق نہیں بتائے گئے، جنید اکبر کا انکشاف
محسن نقوی نے نیشنل پولیس اکیڈمی میں ایک اہم اجلاس کی صدارت بھی کی جس میں اکیڈمی کی تنظیم نو اور پچھلے اجلاسوں میں کیے گئے فیصلوں پر عملدرآمد کا جائزہ لیا گیا۔ اجلاس میں زیر تربیت افسران کو ایف آئی اے، فرانزک ایجنسی، سائبر کرائم اور سیف سٹی جیسے اداروں سے اٹیچ کرنے کے فیصلوں پر بھی غور کیا گیا۔
نیشنل پولیس اکیڈمی کے ڈپٹی کمانڈنٹ نے بریفنگ میں بتایا کہ نیشنل کمانڈ کورس مکمل کرنے والے اے ایس پیز کو ایم ایس کریمنالوجی اور پولیس اسٹڈیز کی ڈگری دی جائے گی، جبکہ تربیتی پروگرام میں تھانوں کے دورے اور متعلقہ اداروں سے عملی وابستگی کو بھی شامل کیا گیا ہے۔
اس موقع پر ڈپٹی کمانڈنٹ نیشنل پولیس اکیڈمی، چیف کمشنر اسلام آباد، ممبر انجنیئرنگ سی ڈی اے اور دیگر اعلیٰ حکام بھی موجود تھے۔
