Gujranwala میں ماں اور بیٹی کے قتل کے سنسنی خیز کیس میں اہم پیش رفت سامنے آئی ہے، جہاں پولیس کے مطابق کیس میں ملوث دو مرکزی ملزمان مبینہ مقابلے کے دوران ہلاک ہو گئے۔
پولیس حکام کا کہنا ہے کہ ملزمان یاسر اور مصطفیٰ کو اسلحہ برآمدگی کے لیے لے جایا جا رہا تھا کہ لدھے والا کے قریب نامعلوم افراد نے پولیس پارٹی پر فائرنگ کر دی۔ اس دوران پولیس کی جانب سے بھی جوابی کارروائی کی گئی۔
حکام کے مطابق فائرنگ کے تبادلے میں دونوں ملزمان اپنے ہی ساتھیوں کی گولیوں کا نشانہ بنے اور موقع پر ہلاک ہو گئے، جبکہ ان کے دیگر ساتھی فرار ہونے میں کامیاب ہو گئے جن کی تلاش جاری ہے۔
پولیس نے مزید انکشاف کیا کہ مقتولہ خاتون کے شوہر مصطفیٰ نے مبینہ طور پر اجرتی قاتل یاسر کے ذریعے اپنی بیوی اور بیٹی کو قتل کروایا تھا، جس کے بعد یہ افسوسناک واقعہ پیش آیا۔
لاشوں کو ضروری قانونی کارروائی کے لیے قریبی ہسپتال منتقل کر دیا گیا ہے، جبکہ فرار ملزمان کی گرفتاری کے لیے پولیس نے مختلف مقامات پر چھاپے مارنے کا سلسلہ تیز کر دیا ہے۔
