گورنر خیبر پختونخوا فیصل کریم کنڈی کا کہنا ہے کہ وزیر اعلیٰ کے پی کو کہتا ہوں، ناچنے والے گھوڑے میدان میں نہیں دوڑتے، گورنر ہاؤس کے 2 پنجرے ابھی خالی ہیں۔
کراچی میں چیئرمین پیپلز پارٹی بلاول بھٹو زرداری کی سالگرہ کی تقریب سے خطاب کے دوران فیصل کریم کنڈی نے کہا کہ گورنر راج آئین میں ایک آپشن ہے، یہ لوگ سیاسی شہید بننا چاہتے ہیں۔
گورنر کے پی نے کہا کہ ہم نے 2008 سے 2013 تک دہشتگردی سے جنگ لڑی اور پختونخوا کو پُرامن بنایا، آج خیبر پختونخوا کا جنوبی علاقہ نوگو ایریا بنا ہوا ہے، اسٹیٹ کی رٹ ختم ہو چکی ہے، 600 ارب روپے خیبر پختونخوا میں آئے ہیں، لیکن کہاں خرچ ہوئے؟
فیصل کریم کنڈی کہنا تھا کہ اگر فوج صوبے سے نکل جائے تو صوبائی حکومت ایک دن بھی امن برقرار نہیں رکھ سکتی۔
رہنما پیپلزپارٹی کا کہنا تھا کہ جو پاکستان کے ترانے کی عزت نہیں کرتا میں اس کی عزت نہیں کرتا، وزیراعلیٰ افغان قونصل جنرل کا اس انداز سے دفاع کر رہے ہیں کہ جیسے وہاں کے وزیر اعلیٰ ہوں، پشتونوں کی یہ روایت نہیں کہ ایسی تقاریر ہوں، اپنے صوبے کو افغانستان کا حصہ نہیں بننے دیں گے۔
