اسلام آباد، الیکشن کمیشن میں جمعیت علمائے اسلام (ف) کے انٹراپارٹی انتخابات نہ کروانے کے حوالے سے کیس کی سماعت میں جے یو آئی (ف) کی جانب سے مزید وقت مانگ لیا گیا ہے۔
الیکشن کمیشن میں جے یو آئی ( ف) کے انٹراپارٹی انتخابات نہ کروانے کے حوالے سے کیس کی سماعت ممبر سندھ نثار درانی کی سربراہی میں 4 رکنی کمیشن نے کی، جمعیت علمائے اسلام کے معاون وکیل الیکشن کمیشن میں پیش ہوئے۔
سماعت کے دوران جے یوآئی (ف) نے انٹرا پارٹی انتخابات کرانے کیلئے مزید وقت مانگ لیا ۔
معاون وکیل کا کہنا ہے کہ جے یو آئی (ف)کے انٹرا پارٹی انتخابات پہلے صوبوں میں ہو رہے ہیں ، صوبوں میں انٹراپارٹی انتخابات کے بعد ہی وفاقی سطح پر ہوں گے، ہم نے متعلقہ ونگ سے اپیل کی ہے کہ تھوڑا ٹائم دیا جائے۔
ڈی جی پولیٹیکل فنانس کا کہنا ہے کہ جے یو آئی (ف) کے انٹرا پارٹی انتخابات کی مدت 7 جولائی سے مکمل ہو چکی ہے، ٹائم مکمل ہونے پر تنظیمی ڈھانچہ بھی ختم ہوجاتا ہے۔
یاد رہے کہ الیکشن کمیشن نے انٹرا پارٹی انتخابات نہ کرانے پر سربراہ جے یو آئی (ف) مولانا فضل الرحمان کو آج طلب کیا تھا۔
