لاہور، وزیراطلاعات پنجاب عظمیٰ بخاری کا کہنا ہے کہ وزیراعلیٰ مراد علی شاہ اور ان کی جماعت 16 سال سے سندھ پر حکومت کر رہے ہیں، وہ اپنی کارکردگی بتائیں، وزیراعلیٰ سندھ کو علی امین گنڈا پور سے مختلف نظر آنا چاہیے۔
وزیراعلیٰ سندھ سید مراد علی شاہ کی پریس کانفرنس پر شدید ردعمل دیتے ہوئے وزیر اطلاعات پنجاب عظمیٰ بخاری نے کہا کہ مراد علی شاہ کو سندھ کے کسانوں سے زیادہ پنجاب کے کسانوں کی فکر لاحق ہے،پنجاب کے کسانوں کی فکر کرنے حکومت پنجاب موجود ہے، آپکو فکر کرنے کی ضرورت نہیں۔
مراد علی شاہ کا کہنا ہے کہ کیا سندھ میں کاشتکار نہیں؟ اور کیا سندھ حکومت نے گندم کی قیمت مقرر کی ہے؟ انہوں نے مزید سوال اٹھایا کہ کیا سندھ حکومت نے کسانوں کیلئے گندم ابھی خرید ی ہے یا نہیں؟
ن لیگی رہنما کا کہنا ہے کہ مراد علی شاہ اور ان کی جماعت گزشتہ 16 برس سے سندھ میں حزب اقتدار ہے، اب انہیں اپنی کارکردگی بتانی چاہیے، وزیراعلیٰ مریم نواز نے 1 سال میں پنجاب کے کسانوں کو 110 ارب روپے کا تاریخ ساز پیکیج دیا۔
صوبائی وزیر کا کہنا ہے کہ پنجاب کے کسانوں کو کسان کارڈ، گرین ٹریکٹر اور سپر سیڈر بھی فراہم کئے جاچکے ہیں، مریم نواز نے ٹیوب ویلز کی سولرائزیشن اور گندم پر 15 ارب روپے کا پیکیج دیا ہے، انہوں نے دعویٰ کیا کہ پنجاب میں اس سال ریکارڈ گندم کی پیداوار ہوئی ہے اور آئندہ سال اس سے بھی زیادہ پیداوار حاصل ہوگی۔
صوبائی وزیر کا کہنا تھا کہ صوبہ پنجاب کی ترقی اور خوشحالی اب دو صوبوں کی حکومتوں کے اعصاب پر سوار ہو چکی ہے، انہوں نے الزام لگایا کہ مراد علی شاہ سندھ کی مرکزی شاہراہ بند کرنے والے مظاہرین کی حمایت کر رہے ہیں، مراد علی شاہ کو وزیراعلیٰ پختونخوا سے مختلف نظر آنا چاہیے۔
