7
میانوالی کے علاقے مکڑوال میں پولیس اور کاؤنٹر ٹیررازم ڈیپارٹمنٹ (سی ٹی ڈی) کی جانب سے خفیہ اطلاع پر کارروائی کی گئی، جس کے نتیجے میں 10 مبینہ خارجی دہشتگرد ہلاک ہو گئے۔
ترجمان پولیس کے مطابق، آپریشن کے دوران دہشتگردوں سے شدید فائرنگ کا تبادلہ ہوا، جس میں کئی دہشتگردوں کے زخمی ہونے کی بھی اطلاعات ہیں۔
مقابلے کے دوران ایک مقامی شہری ٹانگ پر گولی لگنے سے زخمی ہوا جسے فوری طور پر اسپتال منتقل کر دیا گیا۔ پولیس اور سی ٹی ڈی کے تمام اہلکار محفوظ رہے۔
آئی جی پنجاب ڈاکٹر عثمان انور نے کامیاب کارروائی پر پولیس اہلکاروں کو سراہتے ہوئے کہا کہ پنجاب پولیس دہشتگردی کے خلاف پوری طرح چوکس ہے اور ملک دشمن عناصر کے ہر منصوبے کو ناکام بنایا جائے گا۔
وفاقی وزیر داخلہ محسن نقوی نے بھی خراجِ تحسین پیش کرتے ہوئے کہا کہ دہشتگردوں کو جہنم واصل کرنے والے جوان قابلِ فخر ہیں، انہوں نے ثابت کیا کہ خوارج جیسے فتنہ پرور عناصر کے لیے پاکستان میں کوئی جگہ نہیں۔
انہوں نے پولیس اور سی ٹی ڈی کی پوری ٹیم کو شاندار کارکردگی پر مبارکباد دی۔
