اسلام آباد، بلوچستان نیشنل پارٹی (بی این پی) مینگل کے منحرف سینیٹر قاسم رونجھو کی جانب سے سینیٹ رکنیت سے استعفیٰ دے دیا گیا۔
سینیٹر قاسم رونجھو کی جانب سے سیکرٹری سینیٹ کو استعفیٰ جمع کرا دیا گیا۔ قاسم رونجھو سینیٹ میں بی این پی مینگل کے پارلیمانی لیڈر بھی ہیں، سربراہ بلوچستان نیشنل پارٹی سردار اختر مینگل کی جانب سے دونوں سینیٹرز سے استعفیٰ طلب کیا گیا تھا۔
سینیٹر بی این پی مینگل نسیمہ احسان اور قاسم رونجھو نے آئینی ترمیم کے حق میں فلور کراس کیا تھا۔
دوسری جانب وزیراعظم پاکستان شہباز شریف کا کہنا تھا کہ آئینی ترمیم سے عوام کو عدالتی نظام سے جلد انصاف ملے گا۔
وفاقی کابینہ اجلاس میں گفتگو کے دوران وزیراعظم پاکستان نے کہا کہ 26 ویں آئینی ترمیم پاکستان کی ترقی اور خوشحالی کیلئے مؤثر ثابت ہوگی، آئینی ترمیم سے عوام کو عدالتی نظام سے جلد انصاف ملے گا اور جوڈیشل بینچ کے قیام سے عام آدمی کو سہولت ملے گی۔
وزیراعظم شہباز شریف نے کہا کہ 26 ویں آئینی ترمیم 2006 میں ہوئے میثاق جمہوریت کے ایک اور وژن کی تکمیل ہے، آئینی ترمیم پر حکومت میں شامل جماعتوں اور اپوزیشن جماعتوں کیساتھ طویل مشاورت ہوئی۔
