کراچی میں کارساز روڈ پر پیش آنے والے ٹریفک حادثے کے مقدمے میں فریقین کے درمیان معاملات طے پا گئے۔
جان کی بازی ہارنے والے عمران عارف اور آمنہ عارف کے ورثا نے حلف نامے تیار کروا لیے، حلف نامے آج ملزمہ کی درخواست ضمانت کی سماعت میں پیش کیے جائیں گے۔
حادثے میں جاں بحق ہونے والے باپ بیٹی کے ورثا کی جانب سے ملزمہ کی درخواست ضمانت پر نو ابجیکشن سرٹیفکیٹ جمع کرایا جائے گا، این او سی حادثے میں جاں بحق ہونے والے عمران عارف کی زوجہ کی جانب سے جمع کرایا جائے گا۔
عمران عارف کے بیٹے اسامہ عارف اور بیٹی بھی این او سی جمع کرائے گی۔
ورثا کی جانب سے جمع کرائے گئے حلف نامے کے مطابق ہمارے درمیان معاملات طے پا گئے ہیں، ہم نے ملزمہ کو معاف کر دیا ہے، ہم نے اللہ کے نام پر معاف کیا ہے جو بڑا مہربان اور نہایت رحم والا ہے۔
حلف نامے کے مطابق ملزمہ کو ضمانت دینے پر ہمیں کوئی اعتراض نہیں، جو حادثہ ہوا تھا وہ جان بوجھ کر نہیں کیا گیا، ہم نے بغیر کسی دباؤ کہ یہ سرٹیفکیٹ دیا ہے، حلف نامے میں جو کچھ کہا گیا ہے وہ بالکل درست ہے۔
واضح رہے کہ 20 اگست کو کارساز روڈ پرتیز رفتار گاڑی کی ٹکر سے موٹر سائیکل سوار باپ بیٹی جان کی بازی ہار گئے تھے، حادثے میں جاں بحق ہونے والی آمنہ عارف گھر میں سب سے چھوٹی تھی، والد نے اسے پاپڑ فروخت کر کے پڑھایا لکھایا تھا۔
حادثے کے بعد پولیس نے خاتون ملزمہ کو گرفتار کرلیا تھا اور بعد ازاں خاتون ملزمہ کی میڈیکل رپورٹس میں آئس نشے کی موجودگی کی تصدیق ہوئی تھی۔
