گجرات: ڈپٹی کمشنر گجرات صفدر حسین ورک نے QAED اسکول گجرات میں 14 سے 17 اپریل 2025 تک جاری پولیو ورکرز کی تربیتی ورکشاپ کا دورہ کیا۔
گجرات: ڈپٹی کمشنر گجرات صفدر حسین ورک نے QAED اسکول گجرات میں جاری پولیو ورکرز کی تربیتی ورکشاپ کا دورہ کیا جو 14 سے 17 اپریل 2025 تک جاری رہے گی۔ یہ تربیتی سیشن 21 سے 25 اپریل کو ہونے والی انسداد پولیو مہم کے لیے فیلڈ اسٹاف کی تیاری کے سلسلے میں منعقد کیا گیا ہے۔
ڈپٹی کمشنر نے ورکشاپ کے دوران تربیت حاصل کرنے والے ورکرز سے گفتگو کی اور ان کی تیاریوں کا جائزہ لیا۔ انہوں نے کہا کہ پولیو جیسے مہلک مرض کے خاتمے کے لیے تربیت یافتہ، ذمہ دار اور خدمت کے جذبے سے سرشار ورکرز کا کردار کلیدی ہے۔ انہوں نے ورکرز کی حوصلہ افزائی کرتے ہوئے کہا کہ یہ مہم ایک قومی فریضہ ہے، جس کی کامیابی کے لیے ہر فرد کو اپنا کردار ادا کرنا ہوگا۔
صفدر حسین ورک نے محکمہ صحت کو ہدایت کی کہ مہم کے دوران تمام انتظامات کو مکمل رکھا جائے، خصوصاً مائیکرو پلاننگ، ویکسین کی بروقت ترسیل، فیلڈ اسٹاف کی حاضری اور حساس علاقوں میں سیکیورٹی کی فراہمی کو یقینی بنایا جائے۔
انہوں نے کہا کہ تمام متعلقہ محکمے انسداد پولیو مہم کی کامیابی کے لیے ایک ٹیم کی طرح کام کریں تاکہ کوئی بھی بچہ پولیو ویکسین سے محروم نہ رہ جائے۔
