منسک، وزیراعظم شہباز شریف دو روزہ سرکاری دورے پر بیلاروس پہنچ گئے، جہاں منسک ایئرپورٹ پر بیلاروس کے وزیراعظم الیگزینڈر تورچن نے ان کا پُرتپاک استقبال کیا۔
بیلاروس میں پاکستانی سفارتخانے کے حکام بھی وزیراعظم کے استقبال کے لیے ایئرپورٹ پر موجود تھے۔
اس دورے میں وزیراعظم کے ہمراہ نائب وزیراعظم و وزیر خارجہ اسحاق ڈار، وفاقی وزیر اطلاعات و نشریات عطاء اللہ تارڑ اور وزیر اعظم کے معاون خصوصی طارق فاطمی بھی ہیں۔
بیلاروس کے صدر الیگزینڈر لوکاشینکو کی دعوت پر وزیراعظم شہباز شریف 10 سے 11 اپریل 2025ء تک بیلاروس کا سرکاری دورہ کر رہے ہیں۔
اس دوران مسلم لیگ ن کے صدر اور سابق وزیراعظم میاں نواز شریف بھی بیلاروس کے دورے پر روانہ ہوگئے ہیں، اور پارٹی ذرائع کے مطابق وزیراعلیٰ پنجاب مریم نواز شریف بھی ان کے ہمراہ ہیں۔
سینئر صوبائی وزیر مریم اورنگزیب، حسن نواز، چیف سیکرٹری پنجاب زاہد اختر زمان اور نواز شریف کے ذاتی معالج ڈاکٹر عدنان بھی بیلاروس جانے والے وفد میں شامل ہیں۔
ن لیگ کی سیکرٹری اطلاعات مریم اورنگزیب نے اپنے بیان میں کہا تھا کہ نواز شریف آج بیلاروس جا رہے ہیں اور وہ بیلاروس کے صدر کی جانب سے دیئے گئے عشائیے میں بھی شریک ہوں گے۔
