کراچی، سندھ پولیس میں منشیات فروشوں اور اسمگلروں سے تعلق رکھنے والے افسران و اہلکاروں کے خلاف محکمانہ کارروائیاں جاری ہیں۔
آئی جی سندھ کے دفتر سے موصولہ اطلاعات کے مطابق، منشیات فروشوں اور اسمگلرز سے روابط کے الزامات کے تحت خاتون سب انسپکٹر اور سی آئی اے کی انچارج، بینظیر جمالی کو ان کے عہدے سے معطل کر دیا گیا ہے۔
ذرائع کے مطابق بینظیر جمالی پر الزام ہے کہ ان کے منشیات کے دھندے میں ملوث عناصر کے ساتھ تعلقات تھے۔ یہ کارروائی آئی جی سندھ غلام نبی میمن کی ہدایت پر عمل میں لائی گئی۔
نوٹیفکیشن کے مطابق معطلی کے دوران بینظیر جمالی کو قواعد و ضوابط کے مطابق تنخواہ اور دیگر مراعات دی جائیں گی، جبکہ انہیں فوری طور پر بی کمپنی، پی ایچ کیو گارڈن کراچی میں حاضری دینے کی ہدایت کی گئی ہے۔
ذرائع نے مزید بتایا کہ بینظیر جمالی سندھ کی وہ پہلی خاتون سب انسپکٹر ہیں جنہیں منشیات فروشوں سے تعلق کے الزام میں معطل کیا گیا ہے۔
پولیس ذرائع کے مطابق، اس نوعیت کے الزامات میں ماضی میں بھی کئی افسران کو معطل کر کے بی کمپنی رپورٹ کرنے کا حکم دیا گیا تھا۔
