لاہور قلندرز نے پاکستان سپر لیگ (پی ایس ایل) کے دسویں ایڈیشن کے لیے اپنی نئی جرسی کی رونمائی کی ہے، اور اس بار بھی ٹیم کے روایتی رنگوں کو برقرار رکھا گیا ہے۔
قلندرز نے سوشل میڈیا پر ایک ویڈیو کے ذریعے نئی جرسی کی رونمائی کی۔ اس ویڈیو میں ٹیم کے کھلاڑیوں، بشمول کپتان شاہین شاہ آفریدی، سکندر رضا، اوپننگ بیٹر فخر زمان، آصف علی اور دیگر کھلاڑیوں کو نئی کٹ میں ملبوس دیکھا جا سکتا ہے۔
دوسری جانب دو بار کی پی ایس ایل چیمپئن لاہور قلندرز نے اپنی ہوم اور اوے جرسی بھی پیش کی ہے، جو مختلف رنگوں میں ڈیزائن کی گئی ہیں۔
اتوار کو لاہور کے گریٹر اقبال پارک میں قلندرز نائٹ کا انعقاد کیا گیا، جہاں لاہور قلندرز کی نئی کٹ کے ساتھ آفیشل ترانے کی لانچنگ کی گئی اور کپتان شاہین شاہ آفریدی کی سالگرہ بھی منائی گئی، اور کیک کاٹا گیا۔
تقریب میں مشہور گلوکاروں نے اپنے فن کا مظاہرہ کیا، جبکہ ایک شاندار لیزر شو کا اہتمام بھی کیا گیا، جسے شہریوں نے بے حد پسند کیا۔
یاد رہے کہ پی ایس ایل 10 کا افتتاحی میچ 11 اپریل کو دفاعی چیمپئن اسلام آباد یونائیٹڈ اور لاہور قلندرز کے درمیان راولپنڈی کرکٹ سٹیڈیم میں کھیلا جائے گا۔
