آرمی چیف جنرل سید عاصم منیر کی زیر صدارت 268ویں کور کمانڈر کانفرنس ہوئی، جس میں فورم نے شہداء کے ایصال و ثواب کےلیے فاتحہ خوانی کی۔
راولپنڈی: چیف آف آرمی اسٹاف جنرل عاصم منیر کی زیر صدارت کور کمانڈرز کانفرنس میں کہا گیا کہ بلوچستان میں تمام ملکی اور غیر ملکی عناصر کا اصل چہرہ، ان کا گٹھ جوڑ اور انتشار پھیلانے کی کوششیں پوری طرح بے نقاب ہو چکی ہیں۔ ایسے عناصر اور ایسی کوششیں کرنے والوں کو کسی بھی قسم کی معافی نہیں دی جائے گی۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل عاصم منیر کی زیر صدارت 268ویں کور کمانڈرز کانفرنس منعقد ہوئی، جہاں شہدا کے ایصال ثواب کے لیے فاتحہ خوانی کی گئی اور مادر وطن کے لیے شہداء کی قربانیوں کو خراج عقیدت پیش کیا گیا۔
اجلاس میں خطے کی صورت حال، قومی سلامتی کو درپیش چیلنجز اور بڑھتے ہوئے خطرات کا تفصیلی جائزہ لیا گیا۔ فورم نے ہر قیمت پر بلا تفریق دہشت گردی ختم کرنے کے عزم کا اعادہ کیا اور کہا کہ پاکستان کو غیر مستحکم کرنے کی کوشش کرنے والے ملک دشمن عناصر، ان کے سہولت کاروں اور معاونین کے خلاف ریاست پوری طاقت سے نمٹے گی۔
فورم نے واضح کیا کہ کسی کو بھی بلوچستان کے امن میں خلل ڈالنے کی اجازت نہیں دی جائے گی۔ بلوچستان میں انتشار پھیلانے والی قوتوں کو ناکام بنانے کے لیے عوام کی غیر متزلزل حمایت حاصل رہے گی۔
کور کمانڈرز کانفرنس میں نیشنل ایکشن پلان کے تحت "عزمِ استحکام” کی حکمت عملی کو تیزی اور مؤثر طریقے سے نافذ کرنے پر زور دیا گیا۔ اجلاس میں دہشت گردی کے خلاف مشترکہ قومی موقف کی اہمیت کو بھی اجاگر کیا گیا۔
فورم نے اس بات کا اعادہ کیا کہ ریاستی ادارے آئین و قانون کے دائرے میں رہ کر سختی سے عمل کریں گے اور قانون کی عمل داری میں کسی قسم کی نرمی نہیں برتی جائے گی۔
آرمی چیف جنرل عاصم منیر نے نیشنل ایکشن پلان کے تحت ضلعی رابطہ کمیٹیوں کے قیام کو سراہا اور ہدایت دی کہ تمام ادارے مربوط حکمت عملی کے تحت اس کے نفاذ کو یقینی بنائیں۔
اجلاس میں غیر قانونی سرگرمیوں اور دہشت گردوں کی مالی معاونت کے خلاف سخت قانونی کارروائیوں کی ضرورت پر بھی زور دیا گیا اور کہا گیا کہ پاکستان میں دہشت گردوں اور ان کے سہولت کاروں کے لیے کوئی جگہ نہیں۔
کانفرنس میں بھارت کے غیر قانونی طور پر مقبوضہ جموں و کشمیر میں انسانی حقوق کی خلاف ورزیوں پر بھی تشویش کا اظہار کیا گیا اور لائن آف کنٹرول پر بھارتی فوج کی جنگ بندی معاہدے کی خلاف ورزیوں پر خدشات ظاہر کیے گئے۔
فورم نے کشمیری عوام کے جائز حقوق کی حمایت کے عزم کا اعادہ کرتے ہوئے عالمی سطح پر بھارتی مظالم کو اجاگر کرنے کے لیے مستقل سفارتی کوششوں کی ضرورت پر زور دیا۔
کور کمانڈرز کانفرنس میں فلسطینی عوام سے مکمل یکجہتی کا اظہار کرتے ہوئے غزہ میں ہونے والی انسانی حقوق کی سنگین خلاف ورزیوں اور جنگی جرائم کی شدید مذمت کی گئی۔
اجلاس کے اختتام پر آرمی چیف نے فیلڈ کمانڈرز کو آپریشنل تیاریوں اور پیشہ ورانہ مہارت کے اعلیٰ ترین معیارات برقرار رکھنے کی ہدایت کی اور بہترین جنگی صلاحیتوں کے لیے سخت تربیت پر زور دیا۔
