36
اسلام آباد، وزیر اعظم شہباز شریف 4 روزہ سرکاری دورے کے لیے سعودی عرب روانہ ہو گئے۔
وزیر اعظم 22 مارچ تک سعودی عرب میں قیام کریں گے، ان کے ہمراہ وفد میں نائب وزیر اعظم اور وزیر خارجہ سینیٹر محمد اسحاق ڈار سمیت دیگر اہم وفاقی وزراء اور اعلیٰ حکام شامل ہیں۔
دورے کا مقصد پاکستان اور سعودی عرب کے درمیان دوطرفہ تعلقات کو مزید مستحکم کرنا، اقتصادی تعاون کو فروغ دینا اور سرمایہ کاری کے مواقع بڑھانا ہے۔
وزیر اعظم کی سعودی ولی عہد محمد بن سلمان سے ملاقات متوقع ہے، جس میں اقتصادی تعاون کو وسعت دینے کے اقدامات پر گفتگو ہوگی،اس دوران، عالمی اور علاقائی امور، بالخصوص غزہ اور مشرق وسطیٰ کی صورتحال پر بھی تبادلہ خیال کیا جائے گا۔
یہ دورہ پاکستان اور سعودی عرب کے دیرینہ تعلقات کی عکاسی کرتا ہے اور دونوں ممالک کے درمیان تجارت، سرمایہ کاری اور سفارتی روابط کے فروغ میں اہم کردار ادا کرے گا۔
