لاہور، وزیر اعلیٰ پنجاب مریم نواز کا کہنا ہے کہ پنجاب کے خوبصورت سیاحتی حسن کو دنیا کے سامنے لائیں گے۔
سیاحت کی بحالی کے عالمی دن پر اپنے پیغام میں وزیراعلیٰ پنجاب مریم نواز نے کہا کہ صوبے کے مختلف خطوں میں سیاحت کا بے پناہ پوٹینشل پوشیدہ ہے، پنجاب صحراؤں، پہاڑی سلسلوں، جھیلوں اور دریاؤں کی دھرتی ہے۔
وزیراعلیٰ پنجاب کا کہنا ہے کہ صوبہ پنجاب میں سیاحت کے فروغ کیلئے دیرپا اقدامات کئے جا رہے ہیں، معیشت، مقامی ثقافت اور بین الاقوامی تعلقات کے استحکام کیلئے سیاحت ناگزیر ہے۔
مریم نواز کا کہنا ہے کہ مری گلاس ٹرین پراجیکٹ سیاحت کے فروغ کیلئے گیم چینجر ثابت ہوگا، مری کو عالمی معیار کا سیاحتی مقام بنانے کے لئے ماسٹر پلان پر عمل جاری ہے۔
محفوظ اور آرام دہ سفر کیلئے اہم روڈز کی اپ گریڈیشن کی جا رہی ہے، کرتار پور میں عالمی معیار کا ہوٹل بنائیں گے، مذہبی سیاحت کے فروغ پر خصوصی توجہ ہے۔
وزیراعلیٰ کا کہنا ہے کہ پنجاب میں نئے پرکشش سیاحتی مقامات متعارف کرائے جا رہے ہیں، سیاحوں کی سکیورٹی کو یقینی بنانے کیلئے بہترین حفاظتی انتظامات کئے گئے ہیں۔
دوسری جانب سابق وفاقی وزیر فواد چودھری کی جانب سے تحریک انصاف کی سیاسی کمیٹی کو دو ٹکے کی قرار دے دیا گیا۔
سماجی رابطے کی ویب سائٹ ”ایکس“ پر اپنے ایک پیغام میں فواد چودھری کا کہنا تھا کہ یہ دو ٹکے کی سیاسی کمیٹی عمران خان سے جیل میں ہونیوالے سلوک پر خاموش رہی لیکن ایک غیر اہم کلرک پر قراردادیں یاد آگئیں؟
