لاہور، پنجاب کی سینئر وزیر مریم اورنگزیب کا کہنا ہے کہ بشریٰ بی بی کی شکایتوں پر وزیراعلیٰ علی امین گنڈا پور کو ہٹا دیا گیا۔
اپنے بیان میں مریم اورنگزیب نے کہا کہ بانی پی ٹی آئی عمران خان نے صوبائی صدارت سے ہٹا کر وزیراعلیٰ علی امین گنڈا پور کو وفاق کی اکائیوں کو کمزور کرنے کی وفاداری کا انعام دیا، ایک صوبے کے وزیراعلیٰ کو دوسرے صوبے پر چڑھائی کرنے کا حکم دے کر استعمال کر کے فارغ کر دیا گیا۔
مریم اورنگزیب نے کہا کہ سابق وزیراعظم عمران خان کی فطرت میں کسی کے ساتھ وفاداری ہے ہی نہیں، عمران خان ہر دوست، کارکن اور ساتھی کو اپنے ذاتی مقاصد کیلئے استعمال کر کے ٹشو پیپر کی طرح پھینک دیتے اور لوگوں کو ملک کے خلاف سازش کیلئے استعمال کر کے بے یارو مددگار چھوڑ دیتے ہیں۔
لیگی رہنما کا کہنا تھا کہ وزیراعلیٰ علی امین گنڈا پور کو پارٹی کی صوبائی صدارت سے ہٹا کر عمران خان نے وفاداری کرنے والوں کی کمر میں چھرا گھونپنے کی اپنی روایت پھر دہرائی ہے، علی امین کی وفاداری کچھ کام نہ آئی بشریٰ کی شکایتوں پر انہیں عہدے سے ہٹا دیا گیا۔
مریم اورنگزیب کا کہنا ہے کہ سابق وزیراعظم عمران خان کیلئے جس نے جتنی بڑی قربانی دی عمران خان نے اس سے اتنی ہی بڑی احسان فراموشی کی، اکبر بابر، جسٹس وجیہہ، نعیم الحق، جہانگیر ترین اور عبدالعلیم خان عمران خان کی احسان فراموشی کی چند مثالیں ہیں، علی امین گنڈاپور نے بانی پی ٹی آئی عمران خان کیلئے 9 مئی سے لے کر 26 نومبر تک ہر انتشاری مہم میں بڑھ چڑھ کر حصہ لیا۔
سینئر صوبائی وزیر نے کہا کہ عمران خان نے وزیراعلیٰ علی امین گنڈاپور کو صوبائی صدارت کے عہدے سے ہٹا کر اچھا صلہ دیا، 9 مئی اور 26 نومبر کو نوجوانوں کو استعمال کیا اور پھر انہیں جیلوں میں سڑنے کیلئے اکیلا چھوڑ دیا۔
مریم اورنگزیب نے کہا کہ ساری زندگی دوسروں کو اپنے سیاسی مقاصد اور ذاتی مفادات کیلئے استعمال کرنے والے کی فطرت آج بھی نہیں بدلی، آج کوئی پُرانا دوست، عہدے دار، ساتھی کارکن ساتھ کھڑا نہیں ہے۔
