واشنگٹن، نومنتخب امریکی صدر ڈونلڈ ٹرمپ کا کہنا ہے کہ غزہ جنگ بندی معاہدے سے خطے میں امن بحال ہوگا، جنگ بندی معاہدہ ہماری تاریخی کامیابی کا نتیجہ ہے، یہ مشرق وسطیٰ میں امن کیلئے پہلا قدم ہے۔
واشنگٹن میں ریلی سے خطاب کے دوران نومنتخب امریکی صدر ڈونلڈ ٹرمپ نے کہا کہ خوشی ہے یرغمالیوں کی رہائی ہوئی، آنیوالی امریکی انتظامیہ نے 3 ماہ سے کم عرصے میں یہ کامیابی حاصل کی، بائیڈن 4 سال میں وہ نہ کرسکے جو میرے عہدہ سنبھالنے سے پہلے ہوگیا۔
ڈونلڈ ٹرمپ نے کہا کہ ایران کے پاس اب حزب اللہ یا حماس کے لئے پیسہ نہیں، مشرق وسطیٰ کیلئے میرے نامزد ایلچی کی وجہ سے غزہ معاہدہ ہوا، جنگ بندی معاہدے سے خطے میں پائیدار امن قائم ہوگا۔
نومنتخب صدر نے کہا کہ ہم نے الیکشن میں بڑی اکثریت سے کامیابی حاصل کی، ہم ایک بار پھر امریکا کو عظیم بنانے جارہے ہیں، امن وامان بحال کریں گے، تاریخی رفتار اور طاقت کے ساتھ کام کریں گے، امریکا کو پہلے سے زیادہ مضبوط بنائیں گے، غیر قانونی تارکین وطن کی آمد روک کر سرحد کو محفوظ بنائیں گے۔
ڈونلڈ ٹرمپ نے کہا کہ پہلی بار تمام 50 ریاستوں نے ری پبلکنز کی حمایت کی، ری پبلکنز نے صدارتی الیکشن میں نوجوان ووٹرز کا اعتماد جیتا، دنیا بھر سے جرائم پیشہ گروہوں کو امریکا بھیج دیا گیا، دیگر ممالک نے اپنے جرائم پیشہ افراد کو امریکا بھیج کر ان سے نجات حاصل کی۔
نومنتخب صدر نے کہا کہ امریکی سرزمین پر موجود تمام جرائم پیشہ تارکین وطن کو نکالیں گے، امریکی تاریخ میں ملک بدری کا سب سے بڑا پروگرام شروع کروں گا، امریکا کی آزاد بارڈر پالیسی کا خاتمہ کریں گے، غیر قانونی تارکین وطن کی آمد روک کر سرحد کو محفوظ بنائیں گے، اپنے شہریوں کی ترجیحات اور ضروریات کو پہلے رکھیں گے۔
ڈونلڈ ٹرمپ کا کہنا ہے کہ افغانستان کو اربوں ڈالر کی امداد کے باوجود جوبائیڈن نے جنگی سازو سامان طالبان کے سپرد کر دیا، افغانستان سے امریکی جنگ سازو سامان کو بھی واپس لیا جائے گا، بائیڈن کے تمام ایگزیکٹو آرڈرز منسوخ کردوں گا۔
امریکا کو درپیش ہر مسئلے کو حل کروں گا، ایلون مسک فیڈرل سرکاری اداروں کی کارکردگی بہتر بنانے کی نگرانی کریں گے۔
