پشاور، نگران دور میں بھرتی سرکاری ملازمین فارغ کرنے کا فیصلہ کر لیا گیا ہے۔
کے پی، میں نگران دور میں بھرتی کئے گئے ملازمین کو ہٹانے کیلئے خیبرپختونخوا ملازمین سروسز 2025 کے نام سے بل تیار کیا گیا ہے۔
نگران دور میں بھرتی سرکاری ملازمین کو نکالنے کا بل جلد اسمبلی میں پیش کیا جائے گا، متن میں بتایا گیا ہے کہ اس بل کے تحت نگران حکومت کے دوران بھرتی کئے گئے ملازمین کو نوکری سے ہٹانا ہے۔
بل کے متن کے مطابق نگران حکومت کے دوران غیر قانونی طور پر بھرتیاں کی گئیں تھیں، متعلقہ ادارے اس تناظر میں بل پاس ہونے پر نوٹیفیکیشن جاری کریں گے۔
نوٹیفیکیشن کے تحت غیرقانونی بھرتی ہونیوالے ملازمین کو ہٹایا جائے گا، بل کے متن کے مطابق اگر کہیں پر کوئی قانونی پیچیدگی آڑے آئی تو کمیٹی میں ان کا جائزہ لیا جائے گا۔
سیکرٹری اسٹیبلشمنٹ کی سربراہی میں 6 رکنی کمیٹی تشکیل دی جائے گی، کمیٹی میں ایڈووکیٹ جنرل، لاء سمیت محکمہ خزانہ، انتظامیہ اور دیگر متعلقہ اداروں کے سیکرٹریز شامل ہوں گے۔
بل کے متن کے مطابق کمیٹی کا فیصلہ تمام متعلقہ افراد پر لاگو ہوگا، ذرائع کا بتانا ہے کہ سابق نگران دور حکومت میں 15 ہزار سے زائد بھرتیاں کی گئیں۔
