وزیراعلیٰ پنجاب مریم نواز شریف نے اگلے سال طلبہ کو 1 لاکھ ای بائیکس اور 50 ہزار اسکالرشپ دینے کا وعدہ کرلیا۔
اوکاڑہ یونیورسٹی میں وزیر اعلیٰ پنجاب نے تقریب کے شروع میں طلبہ میں اسکالر شپ کے چیک تقسیم کیے اور دوران تقریب انہیں تصاویر اور پورٹریٹ تحفے میں دیے گئے۔
تقریب سے خطاب کے دوران وزیراعلیٰ مریم نواز کا کہنا تھا کہ ہونہار اسکالرشپ پروگرام ملکی تاریخ کا سب سے بڑا پروگرام ہے، میں آج دل کی باتیں کرنے آئی ہوں اور بچوں کی باتیں سننے آئی ہوں۔
مریم نوازشریف کا کہنا ہے کہ وزیرتعلیم رانا سکندر حیات بہترین کام کررہے ہیں وہ اچھے بچوں کی طرح ڈانٹ کھا لیتے ہیں لیکن کام بھی کرتے ہیں، سب کو سچ کی تلاش کرنی چاہیے۔
مریم نواز شریف کی جانب سے یہ اعلان کیا گیا کہ اگلے سال ایک لاکھ طلبہ کو ای بائیکس دوں گی، اس سال پنجاب کے 30 ہزار طلبہ کو اسکالرشپ دیں گے اور اگلے سال پنجاب کے 50 ہزار طلبا کو اسکالرشپ دیں گے۔
وزیراعلیٰ نے کہا کہ ہونہار اسکالر شپ اسکیم میں میرٹ کا خیال رکھا، کسی سٹوڈنٹ سے اس کی سیاسی جماعت کا سوال نہیں کیا گیا، تقریب میں موجود کوئی یہ نہیں کہہ سکتا ہے کہ اسے اسکالرشپ سفارش پر ملی ہو۔
تقریب کے اختتام پر وزیر اعلیٰ مریم نواز طالبات میں گھل مل گئیں اور بچیوں کیساتھ سیلفیاں بنوائیں۔
