رہنما پاکستان تحریک انصاف رؤف حسن نے اسٹیبلشمنٹ کے ساتھ رابطے کی تصدیق کرتے ہوئے کہا ہے کہ ہماری بات چیت جاری ہے، امید ہے یہ گفتگو آگے بڑھے گی۔
ایک انٹرویو میں رؤف حسن کا کہنا تھا کہ موجودہ حکومت چوری کی حکومت ہے، ان کے پاس ہمیں دینے کو کچھ ہے ہی نہیں، اگر مذاکرات کو بامعنی اور بامقصد بنانا ہے تو ان لوگوں سے مذاکرات ہونے چاہئیں جن کے پاس طاقت ہے۔
سابق وزیراعظم عمران خان کی اڈیالہ جیل سے پشاور منتقلی کے حوالے سے زیر گردش اطلاعات سے متعلق سوال پر پی ٹی آئی رہنما کا کہنا تھا کہ عمران خان کو اڈیالہ جیل سے پشاور منتقل کرنے کی آفر بالکل آئی تھی۔
رؤف حسن نے کہا کہ اسٹیبلشمنٹ کیساتھ مذاکرات لازمی ہونے ہیں، عمران خان کی بنائی گئی مذاکراتی کمیٹی کے ارکان ہی اسٹیبلشمنٹ سے رابطے میں ہیں۔
دوسری جانب وزیر اعلیٰ پنجاب مریم نواز شریف کا کہنا ہے کہ انسانی حقوق کا تحفظ اور فروغ مسلم لیگ (ن) کا ویژن ہے۔
انسانی حقوق کے عالمی دن پر اپنے پیغام میں وزیراعلیٰ پنجاب مریم نواز نے کہا کہ ہر انسان رنگ، نسل، مذہب، جنس یا حیثیت سے بالاتر انسانی حقوق رکھتا ہے، دین اسلام انسانی حقوق کا سب سے بڑا داعی ہے، انسانی حقوق کا احترام معاشرے کی ترقی اور خوشحالی کا سنگِ بنیاد ہے۔
