اسلام آباد، ترجمان دفتر خارجہ کا کہنا ہے کہ شام میں تمام پاکستانی شہری محفوظ ہیں۔
ترجمان دفتر خارجہ نے شام کی موجودہ صورتحال پر جاری ایک بیان میں کہا کہ ہم شام میں بدلتی ہوئی صورتحال کا بہ غور جائزہ لے رہے ہیں اور پاکستان نے ہمیشہ شام کی علاقائی سالمیت اور خود مختاری کی حمایت کی ہے۔
ترجمان دفتر خارجہ کا کہنا تھا کہ شام کے متعلق ہمارے اصولی مؤقف میں کوئی تبدیلی نہیں آئی اور شام میں موجود تمام پاکستانی شہری محفوظ ہیں، تاہم شام میں موجود پاکستانی شہریوں کو احتیاط کرنے کا کہا گیا ہے۔
دفتر خارجہ کے جاری کردہ بیان میں کہا گیا ہے کہ شام میں پاکستان کا سفارت خانہ شہریوں کی مدد کے لیے کھلا ہے، ابھی تک دمشق ایئرپورٹ بند ہے، تاہم ہمارا سفارت خانہ پاکستانی شہریوں اور زائرین کے ساتھ رابطے میں ہے۔
جاری کردہ بیان کے مطابق دمشق ایئرپورٹ کھلنے کے بعد شہریوں کی واپسی کی جائے گی۔
یاد رہے کہ شامی باغیوں کی جانب سے دارالحکومت پر قبضے کے بعد سرکاری ٹی وی پر پہلے ہی خطاب میں تمام قیدیوں کے لیے عام معافی کا اعلان کر دیا گیا۔
غیر ملکی میڈیا کے مطابق شامی باغیوں نے اپنی فتح کا اعلان سرکاری ٹی وی پر کرتے ہوئے بتایا کہ شام سے بشار الاسد حکومت کے طویل اقتدار کا سورج غروب ہوچکا ہے۔
