شراب چرانے کی کوشش میں چور پولیس کی کارروائی میں مارا گیا۔
کینیڈا، چور نے ریسٹورینٹ سے شراب چرانے کی کوشش کی اور اس دوران روکے جانے پر چاقو کے وار سے 2 افراد کو شدید زخمی کردیا تاہم پولیس کی کارروائی میں چور ہلاک ہوگیا۔
غیر ملکی میڈیا کا کہنا ہے کہ کینیڈا کے شہر وینکوور میں بدھ کی شام ایک شخص ریسٹورینٹ میں داخل ہوا، جس نے ہاتھ میں چاقو بھی تھام رکھا تھا، مشتبہ شخص کی جانب سے چاقو کے زور پر ریسٹورینٹ سے شراب چوری کرنے کی کوشش کی گئی، اسی دوران چور نے چاقو کے وار سے 2 لوگوں کو زخمی بھی کیا۔
افسوسناک واقعے پر خوف میں مبتلا ایک شخص نے پولیس کو شکایت درج کی، جس پر پولیس کی جانب سے فوری کارروائی کرتے ہوئے موقع پر پہنچ کر فائرنگ کی گئی اور مشتبہ شخص کو شدید زخمی حالت میں گرفتار کرلیا گیا، جو اسپتال پہنچتے ہی دم توڑ گیا۔
پولیس کے مطابق دونوں زخمیوں کو بھی طبی امداد کیلئے اسپتال منتقل کردیا گیا، جہاں دونوں کی حالت خطرے سے باہر ہے۔
