بھارت، ڈاکٹرز کی جانب سے مردہ قرار دیا گیا شخص اپنی آخری رسومات سے پہلے اچانک زندہ ہوگیا۔
غیر ملکی میڈیا کا کہنا ہے کہ ریاست راجستھان سے تعلق رکھنے والے 25 سالہ نوجوان کا نام روہتاش ہے جو قوت گویائی اور سماعت سے محروم ہونے کے ساتھ یتیم خانے میں زندگی گزار رہا تھا۔
میڈیا رپورٹس کے مطابق روہتاش کی طبیعت خراب ہونے کی وجہ سے اسے علاج کیلئے اسپتال منتقل کیا گیا جہاں ڈاکٹرز نے اسے مردہ قرار دے دیا۔
غیر ملکی میڈیا کے مطابق روہتاش کی لاش کو مردہ خانے میں رکھا گیا اور بعد میں رسمی کارروائی مکمل کرنے کے بعد اسے ایمبولینس کے ذریعے شمشان گھاٹ لے جایا گیا۔
غیر ملکی میڈیا کا کہنا تھا کہ جب روہتاش کی لاش کو ہندو رسم و رواج کے مطابق جلانے کیلئے تیاریاں کی جارہی تھیں تو روہتاش اچانک سانس لینے لگا اور اس کا جسم حرکت کرنے لگا جسے دیکھ کر لوگ خوفزدہ ہوگئے۔
حرکت کرتے جسم کو دیکھتے ہوئے روہتاش کو فوری اسپتال لے جایا گیا، جہاں آئی سی یو میں کچھ وقت گزارنے کے بعد اس کی طبیعت میں بہتری آگئی اور ڈاکٹرز کی جانب سے روہتاش کی صحت کو خطرے سے باہر قرار دے دیا گیا۔
غیر ملکی میڈیا کا کہنا ہے کہ ضلعی انتظامیہ کی جانب سے واقعے کی اطلاع ملتے ہی کارروائی کرتے ہوئے 4 ڈاکٹرز کو نوکری سے فارغ کردیا گیا اور معاملے کی تحقیقات کے لیے کمیٹی بھی بنا دی۔
