سربراہ جمیعت علمائے اسلام (جے یو آئی) مولانا فضل الرحمان کا کہنا ہے کہ پی ٹی آئی کے ساتھ کچھ معاملات پر مل کر چل سکتے ہیں یہ ممکن نہیں کہ حکومت کیساتھ بھی اپوزیشن کریں اور اپوزیشن کے اندر بھی اپوزیشن کریں۔
نجی ٹی وی چینل کے پروگرام میں گفتگو کے دوران مولانا فضل الرحمان نے بلاول بھٹو کی حکومت سے ناراضگی پر کہا گیا کہ پیپلز پارٹی حکومت کا حصہ نہیں ہے لیکن پیپلزپارٹی حکومت کا سہارا ہے اس لیے ناراضگی کے مرحلے آتے رہیں گے، اس طرح تو ہوتا ہے اس طرح کی باتوں میں۔
سربراہ جے یو آئی کا کہنا تھا کہ تحریک انصاف کی جانب سے 24 نومبر کے احتجاج کی کال کا وقت مناسب نہیں ہے، مسلسل احتجاجی کالز کی وجہ سے احتجاج کی اہمیت نہیں رہتی۔ مولانا کا کہنا تھا کہ پی ٹی آئی میں مؤثرحکمت عملی بنانے والے لوگ نہیں ہیں۔
مولانا فضل الرحمان کا کہنا ہے کہ صدر مملکت نے ابھی تک مدارس والے بل پر دستخط نہیں کیے، بل پر دستخط نہ کرنے کی کوئی وجہ ہے تو ہمارے نوٹس میں لائی جائے۔
دوسری جانب چیئرمین اسلامی نظریاتی کونسل علامہ راغب نعیمی نے کہا ہے کہ ہمارے وی پی این کے استعمال سے متعلق بیان میں ٹائپنگ کی غلطی سے غلط فہمی ہوئی ہے۔
