اسلام آباد، وفاقی حکومت نے امریکا میں قید ڈاکٹر عافیہ صدیقی کی صحت اور وطن واپسی سے متعلق درخواست کو جلد نمٹانے کے لیے اسلام آباد ہائیکورٹ میں متفرق درخواست جمع کروا دی۔
اسلام آباد ہائیکورٹ میں جسٹس سردار اعجاز اسحاق خان نے کیس کی سماعت کی، جس میں درخواست گزار وکیل عمران شفیق ایڈووکیٹ اور ایڈیشنل اٹارنی جنرل منور اقبال دوگل عدالت میں پیش ہوئے، جبکہ ڈاکٹر فوزیہ صدیقی اور ان کے امریکی وکیل سمتھ ویڈیو لنک کے ذریعے شریک ہوئے۔
دوران سماعت، امریکا کے حوالے کیے گئے داعش کمانڈر شریف اللہ کا تذکرہ آیا۔
جسٹس سردار اعجاز اسحاق خان نے ایڈیشنل اٹارنی جنرل سے استفسار کیا کہ آپ کہتے ہیں امریکا کے ساتھ قیدیوں کے تبادلے کا کوئی معاہدہ نہیں، لیکن بغیر کسی معاہدے کے ایک شخص کو امریکا کے حوالے کر دیا گیا۔
ڈاکٹر شکیل آفریدی کی امریکا حوالگی سے متعلق حکومت کو ان کیمرہ بریفنگ کا موقع بھی دیا گیا تھا، مگر حکومت کی جانب سے غیر تسلی بخش جواب دیا گیا۔ اب حکومت کہہ رہی ہے کہ عافیہ صدیقی کے معاملے کو نمٹا دیا جائے۔
شریف اللہ کی گرفتاری پر پاکستان کو سراہتے ہیں، امریکا
جسٹس سردار اعجاز نے ریمارکس دیے کہ آپ درحقیقت یہ کہنا چاہ رہے ہیں کہ اس کیس سے جان چھڑانا چاہتے ہیں۔ وزیراعظم نے خط لکھ دیا، ویزہ فراہم کر دیا، جو کچھ کرنا تھا وہ کر دیا، مگر اس طرزِ عمل سے دنیا پر واضح ہو جائے گا کہ حکومت پاکستان نے اس معاملے میں کیا کردار ادا کیا۔
پچھلی سماعت پر اٹارنی جنرل آفس کو ہدایت کی گئی تھی کہ حکومت کو تجاویز دے اور عدالت کو آگاہ کرے، لیکن اب آپ کہہ رہے ہیں کہ کیس ختم کیا جائے۔
بعد ازاں عدالت نے حکومت کی متفرق درخواست پر نوٹس جاری کرتے ہوئے کیس کی سماعت آئندہ جمعہ تک ملتوی کر دی۔
