وفاقی وزیر خزانہ محمد اورنگزیب نے کہا ہے کہ آئندہ بجٹ میں حکومت کی کوشش ہوگی کہ عوام پر زیادہ سے زیادہ کم مالی بوجھ ڈالا جائے اور معاشی پالیسیوں کو متوازن رکھا جائے۔
کمالیہ میں میڈیا سے گفتگو کرتے ہوئے وزیر خزانہ نے کہا کہ اس بار بجٹ میں ٹیکسوں میں اضافے کے بجائے انفورسمنٹ اور ٹیکس کمپلائنس کو بہتر بنانے پر توجہ دی جا رہی ہے۔ ان کے مطابق حکومت مہنگائی میں کمی اور معاشی استحکام کے لیے مسلسل اقدامات کر رہی ہے۔
انہوں نے کہا کہ حکومت خطے میں کشیدگی میں کمی کے لیے بھی فعال کردار ادا کر رہی ہے، جبکہ عالمی سطح پر پاکستان کی سفارتی کوششوں کو مثبت انداز میں
سراہا جا رہا ہے۔
وزیر خزانہ کا بجٹ سے متعلق اشارہ: عوام پر کم سے کم بوجھ ڈالنے کی کوشش جاری
محمد اورنگزیب نے سیاسی جماعتوں سے اپیل کی کہ وہ تنقید برائے تنقید کے بجائے ملکی معیشت کی بہتری کے لیے مشترکہ کوشش کریں۔ ان کا کہنا تھا کہ زرعی شعبے میں جدید ٹیکنالوجی کے استعمال سے گندم کی پیداوار میں نمایاں اضافہ ممکن ہے، اور بعض کاشتکاروں نے 60 سے 70 من فی ایکڑ تک پیداوار حاصل کی ہے۔
انہوں نے مزید کہا کہ وزیراعظم شہباز شریف زرعی شعبے کے مسائل سے مکمل طور پر آگاہ ہیں، اور اگر زرعی پیداوار میں اضافہ ہوا تو پاکستان کی برآمدی صلاحیت میں بھی نمایاں بہتری آ سکتی ہے۔
