لاہور کے علاقے ٹبی سٹی میں پولیس نے ایک ایسے ملزم کو گرفتار کر لیا ہے جو خود کو پولیس اہلکار ظاہر کر کے شہریوں سے لوٹ مار کرتا تھا۔ کارروائی ٹبی سٹی لاہور پولیس نے کی۔
پولیس حکام کے مطابق گرفتار ملزم شہریوں کو روک کر خود کو اہلکار ظاہر کرتا اور تلاشی کے بہانے ان سے نقد رقم اور موبائل فون چھین لیتا تھا۔ ابتدائی تحقیقات میں انکشاف ہوا ہے کہ ملزم متعدد وارداتوں میں ملوث رہا ہے۔
ایس پی سٹی کے مطابق ملزم واردات کے دوران پولیس یونیفارم سے مشابہہ لباس، پینٹ اور جوتے استعمال کرتا تھا تاکہ وہ حقیقی اہلکار معلوم ہو سکے۔ اس کے علاوہ وہ نیلی بتی لگی موٹر سائیکل بھی استعمال کرتا تھا تاکہ شہریوں کو مزید دھوکہ دیا جا سکے۔
حکام کا کہنا ہے کہ ملزم شہریوں کو یہ کہہ کر روکتا تھا کہ انہوں نے ناکہ توڑا ہے اور تلاشی دینا لازمی ہے، جس کے بعد وہ موقع کا فائدہ اٹھاتے ہوئے قیمتی اشیاء چھین کر فرار ہو جاتا تھا۔ ابتدائی رپورٹ کے مطابق وہ 50 سے زائد وارداتوں میں ملوث پایا گیا ہے۔
اغواء کی وارداتوں میں ملوث جعلی پولیس افسر اور اہلکار گرفتار
پولیس کے مطابق سی سی ٹی وی فوٹیج میں بھی ملزم کو واردات کے بعد فرار ہوتے دیکھا گیا ہے۔ حسن نقوی کی سربراہی میں کارروائی کرتے ہوئے ملزم کو گرفتار کیا گیا، جس کے خلاف مقدمہ درج کر کے مزید تفتیش شروع کر دی گئی ہے۔
