آسٹریلیا کے سابق مایہ ناز فاسٹ بولر بریٹ لی نے اپنے ملک کو خیرباد کہہ کر دبئی میں مستقل رہائش اختیار کرنے کا اعلان کر دیا ہے۔ انہوں نے اس فیصلے سے متعلق اپنے خیالات سوشل میڈیا پلیٹ فارم انسٹاگرام پر مداحوں کے ساتھ شیئر کیے۔
بریٹ لی کے مطابق ابتدا میں دبئی کے دورے صرف پیشہ ورانہ مصروفیات تک محدود تھے، تاہم وقت کے ساتھ ساتھ یہ دورے نئے مواقع اور بہتر طرزِ زندگی میں تبدیل ہو گئے، جس کے بعد انہوں نے دبئی کو اپنا نیا گھر بنانے کا فیصلہ کیا۔
سابق کرکٹر نے کہا کہ دبئی نہ صرف پیشہ ورانہ ترقی کے وسیع مواقع فراہم کرتا ہے بلکہ یہاں ایک متوازن، محفوظ اور پُرسکون زندگی بھی میسر ہے۔ ان کے مطابق بہترین لوگ، مثبت ماحول اور خاندان کے ساتھ زیادہ وقت گزارنے کی سہولت دبئی کو منفرد بناتی ہے۔
بریٹ لی نے دبئی کے ماحول اور ترقی کے سفر کو سراہتے ہوئے کہا کہ یہاں کی توانائی انسان کو آگے بڑھنے اور خود کو بہتر بنانے کی ترغیب دیتی ہے۔ انہوں نے بچوں کی تعلیم اور کھیلوں کی سہولیات پر بھی اطمینان کا اظہار کیا۔
آخر میں بریٹ لی نے کہا کہ اگرچہ انہیں ہمیشہ آسٹریلیا کو اپنا وطن کہنے پر فخر رہے گا اور وہاں کی یادیں ان کے دل کے قریب ہیں، مگر ان کے بقول دبئی میں واقعی کچھ خاص بات ہے جو اسے ان کے لیے ایک مثالی گھر بناتی ہے۔
