پاکستان کے صائم ایوب ایک بار پھر ٹی ٹوئنٹی کرکٹ میں نمبر ون آل راؤنڈر بن گئے ہیں۔ آئی سی سی کی نئی پلیئرز رینکنگ کے مطابق صائم ایوب 294 ریٹنگ پوائنٹس کے ساتھ پہلے نمبر پر پہنچ گئے، اور انہوں نے زمبابوے کے سکندر رضا سے پہلی پوزیشن چھین لی۔
اسی رینکنگ میں محمد نواز بھی ترقی کرتے ہوئے ساتویں نمبر سے چوتھی پوزیشن پر آ گئے ہیں۔ صائم ایوب اس سے قبل اکتوبر کے پہلے ہفتے میں بھی نمبر ون آل راؤنڈر رہ چکے ہیں۔
ٹی ٹوئنٹی بیٹنگ رینکنگ میں ابھیشیک شرما پہلے اور انگلینڈ کے فل سالٹ دوسری پوزیشن پر ہیں۔ صاحبزادہ فرحان کی دو درجہ تنزلی کے بعد وہ چوتھے سے چھٹے نمبر پر آ گئے ہیں۔
ٹی ٹوئنٹی باؤلنگ رینکنگ میں ابرار احمد کی کارکردگی میں بہتری آئی ہے اور وہ آٹھویں نمبر سے چوتھی پوزیشن پر پہنچ گئے ہیں، جبکہ محمد نواز دو درجے ترقی کے بعد گیارہویں نمبر پر ہیں۔
ون ڈے رینکنگ میں ویرات کوہلی ایک درجہ ترقی کے بعد چوتھے نمبر پر آ گئے ہیں، جبکہ بابر اعظم کی پوزیشن بدستور چھٹی پر برقرار ہے۔ ون ڈے باؤلنگ رینکنگ میں ابرار احمد کی نویں پوزیشن برقرار ہے۔
