بھارتی کرکٹ بورڈ (بی سی سی آئی) نے سابق کپتان اور تجربہ کار اوپننگ بیٹر روہت شرما کو ہدایت کی ہے کہ وہ اپنے مستقبل کے حوالے سے ہونے والی چہ مگوئیوں پر ردعمل دینے کے بجائے اپنی فٹنس اور کارکردگی پر توجہ دیں۔
گزشتہ ماہ آسٹریلیا کے خلاف کھیلی گئی سیریز سے قبل روہت شرما کے بین الاقوامی مستقبل پر متعدد سوالات اٹھ رہے تھے، تاہم انہوں نے اپنی شاندار کارکردگی سے ناقدین کو خاموش کر دیا۔ روہت نے ایک سنچری اور ایک نصف سنچری اسکور کی اور تین میچوں کی سیریز میں سب سے زیادہ رنز بنانے والے کھلاڑی رہے۔
روہت شرما اب 30 نومبر سے جنوبی افریقا کے خلاف شروع ہونے والی ون ڈے سیریز میں بھی ایکشن میں ہوں گے۔
ٹائمز آف انڈیا کے مطابق بی سی سی آئی نے انہیں پیغام دیا ہے کہ میڈیا میں جاری بحث کو نظرانداز کرکے اپنی فٹنس اور جارحانہ بیٹنگ اسٹائل پر فوکس کریں۔
بورڈ ذرائع کا کہنا ہے کہ آسٹریلیا میں کنڈیشنز مشکل تھیں، لیکن کئی مواقع پر محسوس ہوا کہ روہت شرما رسک لینے سے گریز کرتے رہے۔ بی سی سی آئی کا ماننا ہے کہ روہت اور ویرات کوہلی جیسے بڑے بیٹرز اپنی جارحانہ بیٹنگ کے ذریعے نوجوان کھلاڑیوں کے لیے اعتماد اور مثال قائم کرتے ہیں۔
بھارتی میڈیا میں یہ رپورٹس بھی گردش کر رہی ہیں کہ جنوبی افریقا کے خلاف سیریز کے بعد بی سی سی آئی سلیکٹرز اور ٹیم مینجمنٹ کے ساتھ روہت شرما اور ویرات کوہلی کے مستقبل کے کردار سے متعلق مشاورت کرے گا۔
ذرائع کے مطابق بورڈ کا موقف ہے کہ روہت اور کوہلی جیسے بڑے ناموں کے لیے واضح ہونا ضروری ہے کہ ان سے آگے بڑھ کر کیا توقعات ہیں، کیونکہ اس نوعیت کی غیر یقینی صورتحال کے ساتھ کھلاڑی تسلسل برقرار نہیں رکھ سکتے۔
